खिमराज चालीसे, चंडिगढ ।
भारतको हरियाणा राज्यको हिसारमा मूल प्रवाह अखिल भारत नेपाली एकता समाजको १६ औं नगर सम्मेलन हुने भएको छ ।
सम्मेलन तयारीका लागि आइतवार (२ जुन २०२४ मा) तयारी भेला सम्पन्न भएको छ ।
कार्यक्रमको उद्घाटन मूल प्रवाहका केन्द्रीय सचिवालय सदस्य धनवीर पुनमगरले मैनबत्ती बालेर गर्नु भयो ।
समारोहलाई सम्बोधन गर्दै पुनमगरले मूल प्रवाहको नगर सम्मेलन अभियानलाई पुरानो संरचना बदल्ने र नयाँ संरचना निर्माण गर्ने एउटा अभियानको रुपमा बुझ्नु पर्ने धारणा राख्नु भयो।
अथक मिहिनेत र लगनले भारतस्थित नेपालीहरुकोबीचमा एकता समाज न्यायालयको रुपमा स्थापित हुँदै गइरहेको उहाँले बताउनुभयो ।
भेलालाई विभिन्न एरियाका प्रतिनिधिहरूले शुभकामना दिएका थिए । जसमा भेला सफलताको शुभकामना दिने वक्ताहरुमा मूल प्रवाह केन्द्रीय वैकल्पिक सदस्य तारा सोमरे, मूल प्रवाह सुदूर पश्चिमोत्तर क्षेत्रीय सदस्यहरु बाबुराम पोख्रेल, लालबहादुर चुदालि, महिला क्षेत्रीय सदस्यहरु सीता पोख्रेल, कमला बगाले र नगर समितिका नन्द बहादुर लम्तरी लगाएत हुनुहुन्थ्यो।
यस्तै, इन्डस्ट्रियल एरियाबाट सुरेश क्षेत्री, सिटी एरिया ‘ए’ बाट तारा सोमरे, ‘बी’ एरियाबाट मनबहादुर घर्तीमगरले एरियाहरुको रिपोर्टिङ प्रस्तुत गर्नु भएको थियो ।
विभिन्न विषयमा व्यापक छलफल पश्चात बाबुराम पोख्रेलको संयोजकत्वमा ७ सदस्यीय मुल व्यवस्थापन समिति गठन गरिएको छ ।
यस्तै, तारा सोमरेको संयोजकत्वमा ७७ सदस्यीय सम्मेलन प्रचार प्रसार समिति, ओम प्रकाशको संयोजकत्वमा ५ सदस्यीय आर्थिक समिति, सेवक केहर सिंह घर्ति मगरको संयोजकत्वमा ७ सदस्यीय मेस व्यवस्थापन समिति, योगेन्द्र दर्लामीको संयोजकत्वमा ५ सदस्यीय सांस्कृतिक समिति गठन गरिएको छ ।
सेति रानाको अध्यक्षतामा सम्पन्न कार्यक्रमको सञ्चालन विष्णु गौतम र स्वागत चन्द्र प्रकाश गैरेले गर्नु भएको थियो ।
