काठमाडौं । नेपाल कम्युनिष्ट पार्टी स्थापना दिवसका अवसरमा सत्तारुढ नेकपाका दुई अध्यक्ष केपी शर्मा ओली र प्रचण्डले छुट्टाछुट्टै शुभकामना सन्देश दिएका छन् । एक अर्काप्रति लक्षित वक्तव्यको सन्देश पनि फरक फरक छ । पार्टीभित्रको विवाद उत्कर्षमा पुगेका बेला कार्यकारी अध्यक्षको हैसियतमा प्रचण्डले र अध्यक्षकै हैसियतमा ओलीले एक अर्काप्रति लक्षित गरी छुट्टाछुट्टै विज्ञप्ती जारी गरेका हुन् ।

विज्ञप्तीमा दुवैले पार्टी एकता अझै सुदृढ गर्न अपील गरेका छन् भने पार्टीभित्रको विवादलाई सांकेतिक रुपमा उठाएर आपसमा घोचपेचसमेत गरेका छन् ।

विज्ञप्तीमा प्रचण्डलाई लक्षित गर्दै ओलीले भनेका छन्, ‘सिद्धान्तको अन्धानुकरण र यान्त्रिक प्रयोगको सट्टा सिर्जनात्मक प्रयोग मार्फत मौलिक एवम् सही विचारको विकास र अवलम्बन गर्दै सामन्ती, प्रतिगामी, निरङ्कुश र जनविरोधी शक्तिसँग जुधेर नै नेपाली कम्युनिष्ट आन्दोलनले आजको उचाइ हासिल गरेको हो ।’

त्यस्तै ओलीतिर लक्षित गर्दै प्रचण्डले आफ्नो विज्ञप्तीमा भनेका छन्, ‘ऐतिहासिक पार्टी एकतापछि देशी विदेशी प्रतिक्रियावादी शक्तिहरु नेकपालाई कमजोर पार्ने प्रयत्नमा निरन्तर लागिरहेका छन्। प्रतिक्रियावादी षड्यन्त्रलाई परास्त गर्नु, जनमत र जनभावनाको सम्मान गर्दै समाजवादका आधार तयार गर्नु नेकपाको ऐतिहासिक कार्यभार हो । पार्टीभित्र खुला र जनवादी छलफल गरी तथ्यद्वारा सत्यको अन्वेषण गर्ने विधिमार्फत् पार्टी एकतालाई थप सुदृढ बनाउन सकिन्छ ।’

प्रधानमन्त्री ओलीले संसदीय दल वा पार्टीको केन्द्रीय समिति मध्ये एकमा ४० प्रतिशत पुगे पार्टी विभाजन गर्न सकिने अध्यादेश पार्टीमा छलफल नै नगरी ल्याएपछि नेकपाभित्रको विवाद उत्कर्षमा पुगेको छ । यसले नेकपा विभाजनको बाटो खोलेको चर्चा पार्टीभित्र नै भइरहेको छ ।