काठमाडौं । राष्ट्रिय जनमोर्चाका अध्यक्ष चित्रबहादुर केसीले सहकारी ठगी प्रकरणमा मुछिएका गृहमन्त्री रवि लामिछानको नाम नराखिकन बनेको समितिले पीडितलाई न्याय नदिने बताउनुभएको छ ।
मंगलबार संसद भवन परिसरमा सञ्चारकर्मीहरुसँग केसीले लहरो तान्दा पहरो जाने डरले कांग्रेस पछि हटेको आरोप लगाउनुभयो ।
‘सहकारी अपचलन गर्नेको बारेमा यत्रो दिन उफ्रिएर आज कहाँ पुगे? के गरे ? कस्तो समिति बनाए ?’ केसीले भन्नुभयो, ‘सत्तापक्ष प्रतिपक्ष सबै सहकारीमा मुछिएको हुनाले, अब यो संसदमा संकट हुन्छ नि त्यो संकटलाई केही दिन टार्नका लागि यस्ता समिति बनाएर जनतालाई भ्रममा पार्छन् ।’
उहाँले छानबिन गर्दै जाँदा कांग्रेसका नेताहरूसमेत मुछिने भएपछि झारा टार्नेखालको समिति बनेको टिप्पणी गर्नुभयो ।
उहाँले भन्नुभयो, ‘कांग्रेसले यत्रा दिन हल्ला गर्यो । आखिल ‘कहाँ जाउली सेखुली यहीँ देखुली’ भनेजस्तो सहकारीको यत्रो रकम अपचलन गर्नेको नामै नराखेर, छुटाए । सत्ता पक्ष र प्रतिपक्षको लहरो तान्दा पहरो गर्जने भएकोले ।’
अध्यक्ष केसीले अहिले बनेको समितिबाट सहकारी पीडितले न्याय नपाउने र रकम फिर्ता नहुने ठोकुवा गर्नुभयो । संसदीय समिति जनतालाई भ्रम छर्न बनाइएको केसीको भनाई छ ।
उहाँले प्रश्न गर्नुभयो, ‘को चोखो छ ? अहिलेसम्म सहकारीका कतिवटा समिति बने ? संसदीय व्यवस्थामा यस्ता समिति बनाउने अनि छलछाम गर्ने अनि एउटा निष्कर्ष गरेर। यस्ता समितिले, यस्ता नीतिले, यस्ता व्यवहारले लाखौं सहकारीबाट ठगिएका जनतालाई यिनले रकम फिर्ता गरिदिन्छन् ?’
फरक प्रशंगमा अध्यक्ष केसीले बजेट सुन्दा कर्णप्रिय भए पनि कार्यान्वयनको कति हुन्छ भन्ने आधारमा मूल्याङ्कन गरिनुपर्ने बताउनुभयो ।
‘बजेट कार्यान्वयन फितलो हुँदै आएको परम्परा छ । यो पटक पनि कार्यान्वयनको पाटो कस्तो हुन्छ हेर्न बाँकी नै छ, त्यसको आधारमा बजेटको प्रभाकाकारिता निर्धारण हुन्छ’, उहाँले अगाडि थप्नुभयो ।
