काठमाडौँ । चार किसान सङ्गठनले सहकारी, लघुवित्त र मिटरब्याजपीडित किसानका समस्या तत्कालै समाधान गर्न सरकारसित माग गरेका छन् ।
२०८० फागुन २४ गते बिहीबार संयुक्त प्रेसवक्तव्य जारी गर्र्दै उनीहरूले यस्तो माग गरेका हुन् ।
वक्तव्यमा उनीहरूले दुध र उखुकिसानका बक्यौता हर्जाना र ब्याजसहित भुक्तान गर्नुपर्ने, कृषिआयात बन्द गर्नुपर्ने, भूमि बैङ्क रोक्नुपर्नेलगायतका माग राखेका छन् ।
अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी) का अध्यक्ष सीताराम तामाङ, अखिल नेपाल किसान यूनियनका इन्चार्ज लोकनारायण सुवेदी र अखिल नेपाल प्रगतिशील किसान सङ्घका अध्यक्ष दुर्गाप्रसाद जैसीको हस्ताक्षरमा जारी गरिएको प्रेसवक्तव्यको पूर्ण पाठ यस्तो छ :
“नेपाली कृषि र किसानका वर्षौंदेखि थाती रहेका र दिनप्रतिदिन चर्किंदै आएका गम्भीर समस्या हल गरेर कृषिलाई सही दिशा दिने राष्ट्रिय पुँजीको विकास र प्रवद्र्धन गर्दै रोजगारी पैदा गर्ने, कृषिआयात प्रतिस्थापन गर्ने, युवाको पलायन रोक्ने र राष्ट्रलाई समुन्नत दिशातर्फ अग्रसर गराउने र यसरी राष्ट्रियता, जनतन्त्र र जनजीविकाका आधार सबल तुल्याउन कृषि क्षेत्रमा राष्ट्रिय महŒवमा आधारभूत र अपरिहार्य कदम चाल्नुको सट्टा किसानका विभिन्न तह र तप्काले उठाएका जायज माग र आन्दोलनलाई अल्मल्याउने, समस्याको सही समाधान नखोज्ने बरु उल्टै दबाउने जुन गतिविधि अहिलेसम्मका सरकारले गर्दै आएका छन्, त्यसप्रति चार किसान सङ्गठनको गम्भीर ध्यानाकर्षण भएको छ ।
६ किमान सङ्गठनले समस्या समाधानका लागि पटक पटक प्रस्तुत गरेका ६५ सूत्रीय मागलाई पनि वर्षौंदेखि झुलाउँदै बेवास्ता गरेको र हाल किसानको उठिवास गराउने किसानमारा मिटरब्याजे, लघुवित्त र भ्रष्ट सहकारीको तीव्र शोषण तथा उखुकिसान र दुधकिसानले समयमा पाउनुपर्ने रकम पनि महिनौँमहिनासम्म किसानलाई उपलब्ध नगराएर बिचौलिया, सुदखोर र दलाललाई पोस्ने तथा किसान र उपभोक्तालाई निरन्तर मारमा पार्ने जनविरोधी नीतिको हामी जोडदार विरोध गर्दछौँ । किसान र कृषिका समस्यालाई यसरी अनिर्णयको बन्दी बनाएर कृषिक्षेत्रलाई उपेक्षा, तिरस्कार र बेवास्ता गर्ने, कृषिआयातलाई बढावा दिने, राष्ट्रिय अर्थतन्त्रलाई परनिर्भरताको पासोमा धकेल्ने जुन गम्भीर षड्यन्त्र भइरहेको ,छ त्यसका विरुद्ध हामी गम्भीर आपत्ति जनाउँछौँ र घोर विरोध गर्दछौँ साथै तत्काल निम्न कदम चाल्न जोडदार माग गर्दछौँ :
१. आन्दोलनरत स्वर्गद्वारी गुठीलगायत गुठीका मोही किसान, मिटरब्याज, लघुवित्त र सहकारीको शोषणमा परेका किसानका जायज माग तुरुन्त पूरा गर ! वार्तामा अल्मल्याएर टालटुल गर्ने कार्य बन्द गर !
२. दुध र उखुकिसानका सम्पूर्ण बक्यौता रकम हर्जाना र ब्याजसहित तुरुन्त भुक्तानी गर !
३. स्वर्गद्वारी गुठीलगायत सम्पूर्ण गुठीका मोहीको अवस्था र स्थितिको विवरण सार्वजनिक गरेर तिनको मोहियानी हकको सुनिश्चितता गर !
४. नेपाली कृषि उत्पादनलाई विस्थापित र हतोत्साहित गर्ने सम्पूर्ण कृषि आयात बन्द गर !
५. विषादियुक्त तरकारी, खाद्यान्नलगायत कृषिउपजमाथि कडा प्रतिबन्ध लगाऊ !
६. भूमिपूत्र किसानलाई भूमिबाट विस्थापित र विमुख गराउने भूमि बैङ्कलाई नेपाली अर्थतन्त्रमा घुमाउने षडयन्त्र बन्द गर !
७. कृषिलाई समेत साम्राज्यवादी नवउदारवादी शोषणको बन्दी बनाउने षड्यन्त्र विरुद्ध सङ्घर्षरत भारतलगायत विश्वभरिका किसान आन्दोलनप्रति हामी ऐक्यवद्धता जनाउँछौँ ।”
