मेघराज रिष्मेली, टोकियो ।
जापान नेपाली एकता समाजले अङ्ग्रेजी नयाँ वर्ष सन् २०२४ को अवसरमा कार्यक्रम सम्पन्न गरेको छ ।
जनवरी १, २०२४ बुधबारका दिन ओसाकाको तेन्नोजीस्थित बाँसुरी इन्डियन नेपाली रेस्टुरेन्टमा सो कार्यक्रम सम्पन्न भएको हो ।
अन्तर्राष्ट्रिय नेपाली एकता समाजका उपाध्यक्ष हेमलाल गौतमको प्रमुख आतिथ्य र जापान एकता समाजका वरिष्ठ सल्लाहकार नन्दु शर्माको विशिष्ट उपस्थितिमा सो कार्यक्रम अगाडि बढेको थियो ।
कार्यक्रमलाई सम्बोधन गर्दै उपाध्यक्ष गौतमले सबै जापानस्थित नेपालीलाई एकता समाजसँग मिलेर सहकार्य गरी अघि बढ्न र एकता समाजमा गोलबन्द हुन अनुरोधसमेत गर्नुभएको थियो ।
एनआरएनए उपाध्यक्ष भीम काउचाले समेत मन्तव्य राख्नुभएको सो कार्यक्रममा रक्तिम सांस्कृतिक अभियान जापान अध्यक्ष लीला परियार, रक्तिमकै टीका केसी, सहसचिव नवीन बस्याल, वरिष्ठ कलाकार मनबहादुर सलामी, जनप्रगतिशील मञ्च कान्साईका अध्यक्ष लक्ष्मण गैरे, गल्कोट समाज कान्साईका कोषाध्यक्ष विपिन सापकोटा, सल्लाहकार नरबहादुर थापा, लोकगायक केशव शर्मा, कलाकार करिष्मा थापा र जापान ओसाकामा रहेका विभिन्न सङ्घसंस्थाका प्रतिनिधिको उपस्थिति रहेको थियो।
कार्यक्रममा नौमती बाजा समूहको पनि प्रस्तुति रहेको थियो ।
एकता समाजलाई पुर्याएको योगदानबापत् कार्यक्रममा रक्तिम जापानका मनबहादुर सलामी, नौमती बाजा समूह ओसाकाका लोकगायक केशव शर्मा, नृत्यकार करिष्मा थापा, रक्तिमका नृत्यकार सुमित्रा सापकोटालाई एकता समाजका कावा अध्यक्ष डण्ड केसी र प्रमुख अतिथि गौतमले सम्मानपत्र प्रदान गर्नुभएको थियो ।
कार्यक्रममा कावा डण्ड केसीको अध्यक्षता तथा रक्तिम जापानका पूर्व अध्यक्ष सचित्र केसीको सञ्चालन र एकता समाजका सचिव धनराज गौतमले स्वागत गर्नुभएको थियो ।
सो कार्यक्रममा रक्तिम जापानका कलाकारद्वारा गीत र नृत्य प्रस्तुत गरिएको थियो ।
एकता समाजद्वारा धन्यवाद
यसैबिच, जापान नेपाली एकता समाजले एक वक्तव्य जारी गर्दै नयाँ वर्षको कार्यक्रम सम्पन्न भएकोमा त्यसलाई सम्पन्न गर्न सहभागी सम्पूर्ण टिम र सहयोगी सबैलाई धन्यवाद ज्ञापन गरेको छ ।
कावा अध्यक्ष डण्ड केसी र महासचिव तेजेन्द्र क्षेत्रीको हस्ताक्षरमा जनवरी २ का दिन जारी वक्तव्यमार्फत् धन्यवाद दिइएको हो ।
