खिमराज चालिसे, चन्डिगढ ।
प्युठानबाट सात महिनापहिला बेपत्ता भएकी १६ वर्षीय नाबालिग अस्मिता सुवेदी फेला परेकी छिन् ।
मूल प्रवाह अखिल भारत नेपाली एकता समाजले निवेदन दिएको चारै दिनमा राजस्थानको श्रीगङ्गानगरबाट डिसेम्बर १७, २०२३ का दिन फेला परेकी हुन् ।
पीडितले दिएको निवेदनको आधारमा नगर अध्यक्ष गिरुप्रसाद न्यौपानेको नेतृत्वमा हुमबहादुर विक, रेशम भण्डारी, बसन्त नेपाली, विष्णु न्यौपाने, जागेश्वर न्यौपाने, राजेश न्यौपाने, नारायण न्यौपाने, गिरिराजलगायतको टिमले खोजबिन गर्ने क्रममा श्रीगङ्गानगरबाट अस्मितालाई फेला पारेको हो ।
मूल प्रवाहले अस्मितालाई सोही दिन बुबा चन्द्रप्रसादलाई हस्तान्तरण गरेको छ । सात महिनापछि मूल प्रवाहको पहलमा छोरी फेला पारिएपछि बुबा सुवेदीले मूल प्रवाहलाई धन्यवाद ज्ञापन गरेको नगर अध्यक्ष न्यौपानेले बताउनुभयो ।
प्युठान जिल्लाको नौबहिनी गाउँपालिका वडा नम्बर ७ बाट २०८० असार २८ गते स्कुल हिडेकी छोरी बेपत्ता भएको हुँदा यही गत डिसेम्बर १४ का दिन अस्मिताकी बुबा चन्द्रप्रसाद सुवेदीले मूल प्रवाहमा निवेदन दिएका थिए । सो खबर युगदर्शन र नेपाली एकता आनलाइनमा प्रकाशन भएको थियो ।
