खिमराज चालिसे, चंडिगढ ।
मूल प्रवाह अखिल भारत नेपाली एकता समाज चंडिगढ नगर समितिले अघिल्ला वर्षहरू जस्तै यस वर्ष पनि देउसी भैलो खेल्ने भएको छ । आउँदो तिहारमा प्रगतिशील देउसी भैलो खेल्ने तयारीका क्रममा मूल प्रवाहले ५ नोभम्बरका दिन तयारी भेला सम्पन्न गरेको छ ।
जाजरकोट भूकम्पमा निधन भएका मृतकसहित ज्ञात अज्ञात शहिदहरूप्रति दुई मिनट मौन धारण गर्दै श्रद्धाञ्जली अर्पित गरिएको भेलामा नगर समितिले ल्याएको प्रस्ताविक टिम र योजनाहरु मूल प्रवाह केन्द्रीय सदस्य खिमराज चालिसेले प्रस्तुत गर्नु भएको थियो । तत्पश्चात उक्त भेलामा सहभागीहरूबीच व्यापक छलफल गरिएको थियो।
भेलाले यसपटक चंडिगढमा तीनवटा टिम परिचालन गर्ने निर्णयसहित मुख्य जिम्मा समेत तय गरेको छ । जस अनुसार ‘ए’ टिममा प्रेम आचार्यको नेतृत्वमा कोषाध्यक्ष पुरन थापा, ‘बी’टिममा खिमराज चालिसेको नेतृत्वमा कोषाध्यक्ष थानेश्वर पान्डे र ‘सी’ टिममा थमन थापाको नेतृत्वमा कोषाध्यक्ष तेज बहादुर रोकालाई जिम्मा दिइएको छ ।
यसैगरी प्रत्येक टिममा मादल, बाध्यवाधन, गीत, नृत्य समेतको आवश्यक जिम्मा तय गरिएको छ ।
भेलामा मूल प्रवाह केन्द्रीय सदस्य दिनेश खड्का, तिलक पौड्याल, केन्द्रीय सल्लाहकार प्रेम आचार्य, सुदूरपश्चिमोत्तर क्षेत्रीय सदस्य जुना चालिसे, परिषद सदस्य थमन थापा, केन्द्रीय सांस्कृतिक विभाग सदस्य बिनु नेपाली, विद्यार्थी संघका राम पन्थी लगायतले आफ्ना विचार राख्नुभएको थियो ।
यस्तै, दुर्गा विक, लक्ष्मी अधिकारी, मन्जु विक, जमुना खनाल, अर्जुन विक, दानबहादुर जिसी, जीवा गुरुङ र जमुना खड्का लगाएतको टिप्पणी रहेको थियो ।
नगर सहसचिव थानेश्वर पान्डेको सञ्चालन तथा नगर अध्यक्ष मानबहादुर केसीको अध्यक्षतामा सम्पन्न कार्यक्रममा स्वागत पुरन थापाले गर्नु भएको थियो ।
