खिमराज चालिसे, चन्डिगढ (भारत) ।
भारतको पन्जाब राज्यको पटियालास्थित समाना भन्ने ठाउँमा रहेको नशामुक्ति केन्द्रमा अक्टोबर ३१, २०२३ का दिन एक नेपालीको शङ्कास्पद अवस्थामा मृत्यु भएको छ ।
मृतकको शव सामान्य कानुनी प्रकृयासमेत पूरा नगरी अभिभावकलाई बुझाइएपछि यस्तो आशङ्का गरिएको हो ।
घटनास्थलमा पुगेका प्रगतिशील नेपाली समाजका राजेश सोनीले मूल प्रवाह अखिल भारत नेपाली एकता समाजका केन्द्रीय सदस्य एवम् सञ्चारकर्मी खिमराज चालिसेसँग फोन संवादमा गरेका थिए । त्यसपछि सोही दिन राती नै स्थानीयबासीसमेतको दबाबमा प्रहरी रिपोर्ट दर्ता गरिएको थियो ।
नोभेम्बर १, २०२३ बुधबारका दिन निजको परिवारका सदस्य, आफन्तजन र विभिन्न सङ्घसंस्थाका प्रतिनिधिसमेतको उपस्थितमा पोस्टमार्टमपछि दाहसंस्कार गरिएको छ ।
४२ वर्षीय मृतक लक्षिराम लुवार कैलालीको धनगढी निवासी हुन् । अत्यधिक मादक पदार्थ सेवन गरेका कारण केही दिनपहिला उनलाई नशासुधार केन्द्र पटियालामा भर्ना गरिएको थियो ।
शरीरका विभिन्न अङ्गमा चोटको निसान देखिएपछि सन्दिग्ध मानिएका लक्षिरामको मृत्युको कारण अज्ञात रहेकाले थप प्रहरी अनुसन्धान चलिरहेको पटियालाबाट राजेश सोनीले जानकारी दिनुभएको छ ।
