काठमाडौं । राष्ट्रिय जनमोर्चाका अध्यक्ष चित्रबहादुर केसीले नेपाली भूमि छिमेकी राष्ट्र चीनविरुद्ध प्रयोग हुने खतरा बढेको बताउनुभएको छ ।
शुक्रबार अखिल (छैठौं) को राष्ट्रिय परिषद बैठक उद्घाटन गर्दै अध्यक्ष केसीले एमसीसी मार्फत अमेरिकाले नेपालमा बसेर चीनविरुद्ध गतिविधि गर्ने रणनीति लिएको स्पष्ट पार्नुभयो । उहाँले नेपाली भूमि आफ्नो देशविरुद्ध प्रयोग हुने खतराले चिनियाँहरू चिन्तित बनेको पनि बताउनुभयो ।
‘नेपालको भूमिलाई प्रयोग गरेर अमेरिकीहरूले चीन विरोधी गतिविधि गर्दै गएकोमा चिनियाँहरु गम्भीर छन्’ केसीले प्रश्न गर्नुभयो, ‘एमसीसीको प्रयोग गरेर अमेरिकाले नेपालमा चीन विरोधी गतिविधि गरेकोमा चीन प्रष्ट नै छ । के हाम्रो भूमि विदेशीहरूको युद्ध भूमि बनाउनको लागि हो ?’
फरक प्रशंगमा अध्यक्ष केसीले नेपाल युवाहरुलाई विदेश पठाएर उनीहरुले पठाएको रेमिटेन्सबाट सांसद, मन्त्री उत्पादन गर्ने कारखाना बनेको बताउनुभयो ।
उहाँले भन्नुभयो, ‘देशले उत्पादन गर्ने मन्त्री, सांसद मात्र भयो । शिक्षाको बजेट कटौती गरेर यति सानो मुलुकले ८८४ सांसद तथा १३८ जना मन्त्री पाल्नुपर्दा देशको शिक्षा प्रणाली कसरी राम्रो हुन्छ ?’
उहाँले शक्ति राष्ट्रहरूले नेपालको शिक्षा प्रणालीलाई निजीकरण र व्यापारीकरण गरेर ध्वस्त बनाएको बताउनुभयो ।
अखिल छैठौं राष्ट्रिय परिषद् बैठक तथा स्ववियु काउन्सिल भेला त्रिभुवन विश्वविद्यालयको अडोटेरियम हलमा सुरु भएको हो ।
अखिल (छैठौं)का उपाध्यक्ष गणेश अधिकारीको अध्यक्षता तथा महासचिव सुभाष जिसीको सञ्चालनमा भएको कार्यक्रममा सचिव पूरन पोख्रेलले स्वागत मन्तव्य राख्नुभएको थियो ।
बैठकमा संगठनका अध्यक्ष देवेन्द्र कुँवरले पनि धारणा राख्नुभएको थियो ।
यस्तै, अखिल (छैठौं)का पूर्व महासचिव घनश्याम न्यौपाने अधिवक्ता पदम रोका, समीर सिंह, प्राडा श्रीधर गौतम, कपिल खनाल, भीष्म जोशी, हरिकान्त शर्मा, कृष्ण पाण्डे लगायतका नेताहरुले शुभकामना दिनुभएको थियो ।
