काठमाडौं । चीनको वुहानबाट उद्दार गरेर क्वारेन्टाइनमा राखिएका १७५ जनामा कोरोना संक्रमण नभएको पुष्टि भएको छ । नेगेटिभ रिपोर्ट आएपछि क्वारेन्टाइनमा बसेका सबै जना अब आआफ्नो घर जान पाउने छन् ।
चीनको वुहानमा कोरोना संक्रमण फैलिएपछि सरकारले त्यहाँ रहेका १७५ जनालाई ४ फागुनमा उद्दार गरी भक्तपुर, खरिपाटीस्थित नेपाल विद्युत प्राधिकरणको तालिम केन्द्रमा क्वारेन्टाइनमा राखेको थियो ।
१४ दिन क्वारेन्टाइनमा राखेर परीक्षण गर्दा सबैको रिपोर्ट नेगेटिभ आएको सरकारले जनाएको छ । क्वारेन्टाइनमा रहेका सबैको स्वास्थ्य जाँच गरिएकोमा रिपोर्ट नेगेटिभ आएको स्वास्थ्य मन्त्रालयका प्रवक्ता डा. विकास देवकोटाले जानकारी दिए ।
यता, कोरोनाको जस्तै लक्षण हुनसक्ने आशंकामा आइतबार टेकुस्थित शुक्रराज ट्रपिकल तथा सरुवारोग अस्पतालको ‘आइसोलेसन’ वार्डमा भर्ना गरिएका चार जना पुरुषहरुको स्वास्थ्य परिक्षण रिपोर्ट सोमबार साँझसम्म आउने अस्पतालले जनाएको छ ।
अस्पतालका प्रवक्ता डा. अनुप बास्तोलाले सबैको नमूना संकलन भइसकेको र परिक्षणका लागि राष्ट्रिय जनस्वास्थ्य प्रयोगशालामा पठाइएको जानकारी दिए ।
कोरियाबाट आएका ३ जना र चीनबाट आएका १ जना पुरुषमा रुघाखोकी, ज्वरो लगायतका कोरोनासँग मिल्दोजुल्दो लक्षण देखिएपछि उनीहरुलाई भर्ना गरिएको थियो ।
