दमौली । सामुदायिक विद्यालयमा विद्यार्थी आकर्षित गर्न र विद्यार्थी टिकाइराख्न तनहुँको व्यास नगरपालिकाले शुरु गरेको दिवा खाजा प्रभावकारी बन्दै गएको छ । गत पुस १ गतेदेखि शुरु भएको दिवा खाजाले विद्यार्थीलाई आकर्षित गरेको हो ।

व्यास नगरपालिका–५ चिन्तुटारस्थित शुक्र आधारभूत विद्यालयका प्रधानाध्यापक विश्वबन्धु पौडेलले दिवा खाजाले विद्यार्थीलाई विद्यालय नियमित आउने वातावरण सिर्जना गरेको जानकारी दिनुभयो । पौडेलले विद्यालय अनुपस्थित हुने गरेका विद्यार्थी पनि दिवा खाजाको व्यवस्था भएपछि विद्यालय आउन थालेका छन् ।

व्यास नगरपालिका–११ शेरास्थित वसन्त आधारभूत विद्यालयका प्रधानाध्यापक शर्मिला पौडेल ओझाले कार्यक्रम शुरु भएको छोटो अवधिमा नै दिवा खाजाले विद्यार्थी आकर्षित गर्न सफल भएको जानकारी दिनुभयो । नगरपालिकाले नगर क्षेत्रभित्र रहेको ७५ वटा विद्यालयका बालविकास र एक कक्षाका विद्यार्थीलाई दिवा खाजाको व्यवस्था शुरु गरेको छ । फागुन मसान्त सम्मका लागि नगरपालिकाले दिवा खाजाको व्यवस्था शुरु गरेको व्यास नगरपालिकाले जनाएको छ ।

दिवा खाजा कार्यक्रम लागू भएसँगै विद्यार्थी नियमित विद्यालय आउने र शिक्षण सिकाइ क्रियाकलापमा सहभागी हुने विश्वास गरिएको व्यास नगरपालिकाका प्रमुख बैकुण्ठ न्यौपानेले जानकारी दिनुभयो । बालविकास कक्षामा अध्ययनरत साना बालबालिकाले दिउँसोको खाजा आफँै व्यवस्थापन गर्न नसक्ने हुँदा उनीहरुलाई खाजाको व्यवस्था सम्बन्धित विद्यालयले नै गरिदिने न्यौपानेले बताउनुभयो ।

शिक्षा, युवा तथा खेलकूद शाखाका प्रमुख नगेन्द्रराज रेग्मीका अनुसार बालविकासअन्तर्गत एक हजार एक सय १० र कक्षा १ का ७२१ विद्यार्थीलाई दिवा खाजाको व्यवस्था गरिएको छ । दिवा खाजा कार्यक्रमका लागि प्रतिविद्यार्थी दैनिक रु १५ उपलब्ध गराइनेछ । रेग्मीका अनुसार दिवा खाजा कार्यक्रमका लागि रु २१ लाख १६ हजार १२५ विनियोजन गरिएको छ ।नगरपालिकाले आगामी आर्थिक वर्षदेखि कक्षा १ देखि ५ सम्मका विद्यार्थीलाई पनि दिवा खाजाको व्यवस्थापन गर्ने जनाएको छ ।

तनहुँको म्याग्दे गाउँपालिकाले पनि विद्यालयमा विद्यार्थी नियमित आउने वातावरण बनाउन गत वर्षदेखि दिवा खाजाको व्यवस्था शुरु गरेको थियो । गाउँपालिकाभित्र रहेका २१ वटा सामुदायिक विद्यालयका विद्यार्थीलाई दिवा खाजाको व्यवस्था गरिएको गाउँपालिकाका अध्यक्ष मायादेवी रानाले जानकारी दिनुभयो । गाउँपालिकाभित्र ३१ वटा सामुदायिक विद्यालय रहेकामा माध्यमिक तहका १० वटा विद्यालयबाहेक आधारभूत, प्राथमिक र बाल विकास केन्द्र गरी २१ वटा विद्यालयमा दिवा खाजा कार्यक्रम लागू छ ।

दिवा खाजाको व्यवस्था भएपछि विद्यार्थीको उपस्थिति प्रभावकारी बन्दै गएको छ । दिवा खाजा अभियानले सबै सामुदायिक विद्यालयलाई तयारी खाना जङ्कफुडमुक्त बनाउने अभियानलाई सहयोग पु¥याएको रानाले जानकारी दिनुभयो ।