काठमाडौँ । अखिल नेपाल किसान महासङ्घ (अप्फा) ले काठमाडौँ बागमती नदीकिनारको थापाथली सुकुम्बासी आन्दोलनप्रति समर्थन व्यक्त गरेको छ ।
अध्यक्ष भैरवराज रेग्मीको हस्ताक्षरमा २०७९ मङ्सिर १३ गते प्रेसवक्तव्य जारी गर्दै अप्फाले आन्दोलनप्रति समर्थन जनाएको हो ।
सुकुम्बासी र अव्यवस्थित बसोबासीका जायज माग प्रधानमन्त्रीसमक्ष पेस गरिसकिएकोमा वैकल्पिक व्यवस्था नगरी उनीहरू हटाउन थालिएकोमा अप्फाले विरोध गरेको छ ।
भूमि ऐनसम्मत सुकुम्बासीको वैकल्पिक व्यवस्था गर्नुपर्ने, त्यस क्रममा कानुनमा फेरबदल गर्नुपर्ने भए त्यसो गर्न आग्रह गरिएको प्रेसवक्तव्यको पूर्ण पाठ यस्तो छ :
“काठमाडौँ महानगरपालिकाले वैकल्पिक व्यवस्थाबिना काठमाडौँमा बिसौँ वर्षदेखि बसोबास गरिरहेका सुकुम्बासी र अव्यवस्थित बसोबासीमार्फत डोजर लगाएर उठिबास गराउने काम गरेको छ । यसका विरुद्ध सुकुम्बासीहरूले आन्दोलन गरिरहेका छन् । उक्त आन्दोलनप्रति अखिल नेपाल किसान महासङ्घ (अप्फा) समर्थन गर्दछ ।
ती सुकुम्बासी र अव्यवस्थित बसोबासीको जायज मागलाई समेत लिएर अप्फालगायत चार किसान सङ्गठन र छ किसान सङ्गठनले प्रधानमन्त्रीसमक्ष मागपत्र पेस गरेका छन् । काठमाडौँ महानगरपालिकाले ती सुकुम्बासीको वैकल्पिक व्यवस्था नगर्ने, कमसेकम कानुनसम्मत कारबाही नगर्ने, भूमि ऐनको कार्यान्वयन नगर्ने, राष्ट्रिय भूमि आयोग र सुकुम्बासीसँग कुनै समन्वय नगर्ने, राष्ट्रिय भूमि आयोगको एक अंश स्वयम् महानगरपालिका पनि भएकाले राष्ट्रिय भूमि आयोगको कार्यविधि र ऐनअनुसार जबर्जस्ती सुकुम्बासीमाथि दमन गर्ने कदमको अप्फाले विरोध र भत्र्सना गर्दछ ।
काठमाडौँ महानगरपालिकाले राष्ट्रिय भूमि आयोगसँग सहमति पत्रमा हस्ताक्षर गरिसकेपछि नेपाल सरकारका कानुन र राष्ट्रिय भूमि आयोग गठन आदेश र कार्यविधिअनुसार वास्तविक सुकुम्बासीका लगत सङ्कलन गर्ने र त्यसको पहिचान गर्ने, अव्यवस्थित बसोबासीको पहिचान गरी नेपाल सरकारको नियम, कानुनअनुसार उनीहरूको वैकल्पिक व्यवस्थाको बाटोमा नलागी डोजर लगाई सुकुम्बासी बस्तीमाथि आक्रमण गर्ने कार्य भइरहेकोले त्यसलाई बन्द गरी सुकुम्बासीको वैकल्पिक व्यवस्था गर्न काठमाडौँ महानगरपालिकासँग माग गर्दछ ।
सुकुम्बासीको बसोबासको वैकल्पिक व्यवस्था मिलाउनका लागि ऐनकानुन बदल्नुपर्दछ भने पनि ऐनकानुन बदल्न नेपाल सरकार, सरकारमा सामेल हुने राजनीतिक पार्टी, नेपाल सरकारका सरोकारवाला निकायहरू यो समस्या समाधानमा लाग्न जोडदार माग गर्दछ ।”
