कावासोती । राष्ट्रिय जनमोर्चाका केन्द्रीय कार्यकारी अध्यक्ष रश्मीराज नेपालीले आगामी मङ्सिर ४ गतेको चुनावमा गिलासमा भोट दिन आग्रह गर्नुभएको छ ।
राजमो समानुपातिक उम्मेदवार केन्द्रीय प्रचार टोलीले नवलपुरको डन्डामा २०७९ कात्तिक २७ गते आयोजनामा गरेको कोणसभालाई सम्बोधन गर्दै उहाँले यस्तो अभिव्यक्ति दिनुभएको हो ।
‘सही राजनीतिक पार्टी चुन्ने मौका जहिलेसुकै आउन्न’ अध्यक्ष नेपालीले भन्नुभयो– ‘आगामी मङ्सिर ४ गतेको चुनावमा जनताले राजमोको चुनाव चिह्न गिलासमा भोट दिन म अनुरोध गर्दछु ।’
प्रत्यक्षतर्फ वाम–लोकतान्त्रिक गठबन्धनलाई भोट दिन आग्रह गर्दै उहाँले समानुपातिकतर्फ भने सबैले गिलासमा मतदान गर्नुपर्ने आवश्यकतामा उहाँले जोड दिनुभयो ।
‘नेपालमा सबै राजनीतिक पार्टीमध्ये राष्ट्रिय जनमोर्चा मात्रै यस्तो पार्टी हो’ उहाँले अगाडि भन्नुभयो– ‘राजमोले राष्ट्रियता, लोकतन्त्र र धर्म निरपेक्षताका सवालमा सधैँ सम्झौताहीन सङ्घर्ष गर्दै आइरहेको छ । यस अर्थमा आम जनताको भोट पाउनका लागि राजमो योग्य छ ।’
उहाँले सङ्घीयताले नेपालको राष्ट्रियता कमजोर हुने बताउँदै त्यसको खारेजीका लागि पनि राजमोमा प्रतिनिधिहरू ठुलो सङ्ख्यामा संसद्मा जानुपर्ने बताउनुभयो ।
‘लोकतन्त्र, राष्ट्रियता र गणतन्त्रको रक्षाका लागि राजमोका प्रतिनिधिहरू ठुलो सङ्ख्यामा संसद्मा जानैपर्दछ’ उहाँले भन्नुभयो– ‘त्यसका साथै राष्ट्रका लागि बोझ बनेको सङ्घीयताको खारेजीका लागि पनि हाम्रो उपस्थिति संसद्मा आवश्यक छ ।’
‘त्यसैले हाम्रो दाबी छ, पाँच वर्षपछि आएको मङ्सिर ४ गतेको चुनावमा गिलासमा मतदान गर्नुहोला’ अध्यक्ष नेपालीको अनुरोध थियो ।
कार्यक्रमलाई सम्बोधन गर्दै केन्द्रीय उपाध्यक्ष जनकराज शर्माले वाम–लोकतान्त्रिक गठबन्धन जनताप्रति उत्तरदायी सहकार्य भएको दाबी गर्नुभयो ।
‘हामीले यो गठबन्धन नबनाएको भए संविधान धरापमा पर्दथ्यो’ उहाँले भन्नुभयो– ‘यो संविधान जनआन्दोलनको म्यान्डेटअनुरूप बनेको भन्ने प्रतिगमनकारीले बिर्सेका थिए ।’
पाँचदलीय गठबन्धनकै कारण निष्क्रिय हुन थालेको संविधान पुनः सक्रिय भएको बताउँदै उहाँले यसको रक्षाका लागि गठबन्धन बनेको बताउनुभयो ।
कार्यक्रमलाई रक्तिम सांस्कृतिक अभियानका महासचिव जीवन शाही, प्रतिनिधि सभातर्फ राजमोका उम्मेदवार विकाराम चौधरी र राजमो नवलपुरका सचिव गिरबहादुर महतराले पनि सम्बोधन गर्नुभएको थियो ।
सो अवसरमा अखिल नेपाल किसान महासङ्घ (अप्फा) का अध्यक्ष भैरवराज रेग्मी, वामपन्थी नेता भागिरथ शर्मालगायतको आतिथ्य रहेको थियो ।
अभियान टोली आजै रुपन्देहीको बुटवलतर्फ लागेको छ । अभियानको सभापन भोलि कात्तिक २८ गते बुटवलमा हुने छ ।
