अखिल नेपाल राष्ट्रिय स्वतन्त्र विद्यार्थी युनियन (छैठौं) को काठमाडौं उपत्यका स्तरीय भेला सम्पन्न भएको छ । आगामी चैत्र १ गते देखि ५ गते सम्म सञ्चालन हुने संघीयता विरुद्ध काठमाडौं केन्द्रित कार्यक्रमको तयारीका लागि देशब्यापी भेला र बैठक सञ्चालन गरिरहेको अखिल (छैठौं) ले शनिबार राजधानीको भृकुटीमण्डपमा भेला सम्पन्न गरेको हो ।
भेलालाई सम्बोधन गर्दै संगठनका अध्यक्ष विमल पोख्रेलले नेपालको लागि संघीयता घातक भएको भन्दै यसको खारेजी आजको प्रमुख आवश्यकता भएको बताउनु भएको थियो । हिजोका शासकले आफूलाई त्यो समयमा जति नै शक्तिशाली देखाए पनि जनहित विरोधी सत्ताहरु समेत जनताका आन्दोलनबाट च्युत भएको स्मरण गर्दै राष्ट्रघाती संघीयता सडकबाट जनताले उखेलेर फाल्ने चेतावनी दिनु भयो ।
भेलामा अखिल (छैठौं) का केन्द्रीय सचिव सुवास जिसिले सम्पुर्ण स्वाभिमानी नेपाली विद्यार्थीहरु एकजुट भइ काठमाडौंको सडकवाट संघीयता विरुद्द धावा बोल्न अपिल गर्नुभयो । जिसिले विद्यार्थीहरुको काम पढ्ने मात्र नभइ यो देशको राष्ट्रियताको संरक्षण गर्नु पनि हो भन्दै देश बचाउने अभियानलाई सफल बनाउनुपर्ने कुरामा जोड दिनुभयो ।
भेलामा नेकपा (मसाल) काठमाडौंका जिल्ला प्रवक्ता जगत रेग्मी र अखिल (छैठौं)का पूर्व सल्लाहकार भीष्म जोशीले आफ्नो विचार प्रकट गर्नुभएको थियो । कार्यक्रममा राष्ट्रिय जनमोर्चा काठमाडौंका छवि खनाल, अखिल (छैठौं) का काठमाडौं जिल्ला अध्यक्ष प्रतिभा शर्मा, पूर्व राष्ट्रिय परिषद सदस्य टंक जिसि, वाग्लुङ–काठमाडौं सम्पर्क समितिका अध्यक्ष शुर्य पौडेल लगाएतको आतिथ्यता रहेको थियो ।
भेलाले सुवाश जिसिको संयोजकत्वमा १५ सदस्यीय उपत्यका परिचालन समिती र सृजना जिसिको संयोजकत्वमा ५५ सदस्यीय आन्दोलन प्रचार समिती गठन गरेको छ । आगामी माघ र फागुनमा उपत्यका व्यापिरुपमा आन्दोलन प्रचारप्रसार गर्न परिचालन समितिले कार्य योजना बनाइ कार्यान्वयन गर्ने निर्णय भएको छ ।
भेला अखिल (छैठौं)का केन्द्रीय सदस्य प्रतिभा आचार्यको सञ्चालन र सचिवालय सदस्य सृजना जिसिको अध्यक्षतामा सम्पन्न भएको हो ।
