काठमाडौं । नेपाली कामदारलाई जापानमा रोजगारीका लागि नेपाल र जापान सरकारबीच भएको सहमति अनुसार यसवर्ष करिब ८ हजार जनाले भाषा र सीपको परीक्षा दिन पाउने भएका छन् ।

गत वर्षदेखि सुरु भएको नेपाली कामदार लैजाने प्रक्रियालाई जापानले यो वर्ष थप तीव्रता दिन लागेको हो । जापानले एकदुई महिनाको फरकमा नेपाली कामदार लैजान परीक्षा लिने जानकारी गराएको श्रम रोजगार तथा सामाजिक सुरक्षा मन्त्रालयका उपसचिव दीपक ढकालले बताए ।

सन् २०१९ मा नर्सिङ केअरगिभरका लागि १,००० आवेदकले परीक्षा दिन पाएका थिए । अब वर्षभरि नै परीक्षा लिने कामलाई निरन्तरता दिइने जानकारी जापानले नेपाललाई गराएको बताइएको छ ।

त्यस अनुसार जनवरीमा १ हजार जना र मार्चमा १ हजार तीन सय जनाको परीक्षा लिन जापान फाउन्डेशनले तालिका सार्वजनिक गरिसकेको छ।

गत वर्ष नर्सिङ केअरगिभरको काममा जान झन्डै १३ हजार जनाले आवेदन दिएका थिए । तर पहिला आवेदन दिनेमध्येबाट गोलाप्रथा गरेर केवल १ हजार जना परीक्षाका लागि छानिएकाले सक्षम आवेदकले अवसर नपाएको नेपाली अधिकारीहरूको भनाइ छ।

पहिलो परीक्षामा नेपाली आवेदकहरू भाषा र सीप परीक्षा दुवैमा निकै कमजोर देखिएको बताइन्छ । त्यसैले जापानमा रोजगारी गर्न जाने आकाङ्क्षीका लागि सीपविकास र भाषाप्रशिक्षणमा पनि लगानी गर्नुपर्ने देखिएको छ ।

जापानले निजी इन्स्टिट्यूटमा जापानी भाषा पढाउने शिक्षकलाई जापानमै लगेर प्रशिक्षण दिएको थियो । तर सीपविकासमा नेपाल आफैँले अहिलेसम्म ठोस कदम चालेको नदेखिने जानकारहरू बताँउछन् ।

गत वर्ष मार्च महिनामा नेपाल र जापानका अधिकारीहरूले श्रमसम्बन्धी एउटा सम्झौतामा हस्ताक्षर गरेका थिए । जापानसँग भएको समझदारीमा नर्सिङ केअरगिभरबाहेक अन्य १३ वटा क्षेत्रमा पनि नेपाली कामदार लैजाने उल्लेख छ।