खिमराज चालीसे, चंडीगढ ।
मूलप्रवाह अखिल भारत नेपाली एकता समाज चंडिगढ नगर समितिले क्यान्सर रोगबाट पीडित गुल्मीका १२ वर्षीय बालक संन्दिप खड्कालाई १० हजार रुपैयाँ सहयोग गरेको छ । मूलप्रवाहका चंडिगढ नगर अध्यक्ष मान वहादुर केसीले बुधबार (२५ डिसेम्बर) पीडितका परिवारलाई सो रकम हस्तान्तरण गर्नुभएको हो ।

गुल्मीको मदाने गाउँपालिका–५ मलागिरी, खोप्चा निवासी कमल खड़का र कल्पना खड़काका जेठो छोरा सन्दिप विगत ३ वर्षदेखी क्यान्सर सँग संघर्ष गरिरहेका छन् । उनको उपचार शेरपुर लुधियाना पंजाब स्थित मोहन्दोई क्यान्सर अस्पतालमा भइरहेको र त्यहाँ निको नभयपछी चंडीगढ पिजीआइ रेफर गरिएको थियो । गत अक्टूबरदेखि पिजीआइमा उपचार गराइरहेका उनको हालसम्म एउटामात्र किमो चढाइएको वुवा कमलले बताए ।

रकम हस्तान्तरणका अवसरमा मूलप्रवाहका केन्द्रीय सल्लाहकार तिलक पौडयाल, क्षेत्रीय सदस्य प्रेम आचार्य, नेपाली समाचारका संवाददाता खिमराज चालिसे, महिला क्षेत्रीय सचिव जुना चालिसे, नगर सहसचिव थानेश्वर पाण्डे, सदस्य थमन थापा, महिला नगरकी सरस्वता भुसाल, र मूप्रवाह सदस्य राजेंद्र एमसीलगायतका नेताहरु सहभागी हुनुहुन्थ्यो ।

मूलप्रवाहले रोजी–रोटीको समस्याले विदेश पसेका नेपालीहरुको समस्या समाधान गर्न पहल गर्नुका साथै राजनीतिक परिवर्तनका लागि समेत संघर्ष गर्दै आएको छ।