काठमाडौं । शिक्षा,विज्ञान तथा प्रविधि मन्त्री गिरिराजमणि पोखरेलले अतिरिक्त शुल्क लिने मेडिकल कलेजलाई कार्वाही गर्ने चेतावनी दिएका छन् । सरकारले दिएको १५ दिने अल्टिमेटम सकिएपछि मन्त्री पोखरेलले कलेज सञ्चालकहरुलाई बोलाएर अब कार्वाही थाल्ने चेतावनी दिएका हुन् ।
मन्त्री पोखरेलले अल्टिमेटम सकिएपछि पनि शुल्क फिर्ता नभएको भन्दै सरकारले कारर्वाहीको प्रक्रिया अगाडि बढाउने जानकारी दिन मेडिकल कलेज सञ्चालकहरुलाई सोमबार मन्त्रालय बोलाएका थिए ।
आजको बैठकमा मेडिकल कलेज संचालकहरुले भोली सम्मको समय माग गरेकोले निर्णय भने हुन सकेन । सरकारले एमबीबीएस, वीपीएच, नर्सिङ, बीडीएस, बीएमएलटी, बीएमआईटी लगायतका आठ वटा संकायको सरकारले शुल्क निर्धारण गरेको छ । तर, कलेजले आठ वटा संकायका ३२ ब्याजका विद्यार्थीबाट अतिरिक्त शुल्क लिँदै आएका छन् । जसको निरन्तर विरोध र प्रदर्शन भइरहेको छ ।
यसैबीच निजी मेडिकल कलेज सञ्चालक शुल्क समायोजन गर्न लचिलो बनेको मन्त्रालयले जनाएको छ । मेडिकल कलेज सञ्चालकहरुले आन्तरिक छलफल गरि अतिरिक्त शुल्क फिर्ता गर्न भोलिसम्म लिखित प्रतिबद्धता जनाउने जनाइएको छ ।
