काठमाडौँ । नेपाल अर्बुद रोग विजेता समाज (नेपाल क्यान्सर सर्भाइभर्स सोसाइटी) काठमाडौँले अक्टोबर महिनाभरि महिलामा हुने ब्रेस्ट क्यान्सर विरुद्ध विशेष सचेतना अभियान सञ्चालन गर्ने भएको छ ।
संस्थाकी अध्यक्ष प्रमिता खनालले २०७८ असोज १० गते तदनुसार सेप्टेम्बर २६, २०२१ का दिन प्रेसवक्तव्य जारी गर्दै सो जानकारी दिनुभएको हो ।
अन्तर्राष्ट्रिय स्तरमा अक्टोबर महिनालाई सचेतनामूलक सन्देश प्रवाहका साथ मनाइने जानकारी दिइएको सो वक्तव्यमा ‘क्यान्सरको समयमै उपचार गर्ने हो भने निको हुन्छ’ अभियानको मूल नारा रहेको जानकारी दिइएको छ ।
कार्यक्रममा सहयोगी संस्थाहरू आई.एफ.एच.आर., ब्लड क्यान्सर सोसाइटी नेपाल, प्रायोजक प्राइम लाइफ केयर इन्टरनेसनल प्रालि तथा विशेष सहयोगी बुढानीलकण्ठ यातायात प्रालि र बिकोनजस्ता संस्था रहेका छन् ।
प्रेसवक्तव्यमा नेपाल अर्बुद रोग विजेता समाज १३ वर्षअगाडि देखि क्यान्सर सचेतनाको क्षेत्रमा जोडिएको भएता पनि गत चार वर्षदेखि विधिवत संस्थाको रूपमा सञ्चालनमा आएको जानकारी गराइएको छ ।
संस्थाले क्यान्सरका बिरामीलाई मनोपरामर्श सेवा प्रदान गर्नुका साथै महिलालक्षित विभिन्न स्वास्थ्य शिविर, स्कुलकलेजका छात्रालाई क्यान्सरबारे सचेत गराउने, स्वास्थ्य स्वयम्सेवासम्बन्धी तालिम दिने, विभिन्न किसिमका कार्यक्रममार्फत आर्थिक सहयोग सङ्कलन गरेर आर्थिक अवस्था कमजोर भएका क्यान्सर बिरामीलाई सहयोग गर्दै आइरहेको वक्तव्यमा उल्लेख छ ।
वक्तव्यमा अक्टोबर १, २०२१ तदनुसार २०७८ असोज १५ गतेको कार्यक्रमको तालिका पनि दिइएको छ ।
