काठमाडौं । गत २४ घण्टामा १ हजार ५५८ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयले दिएको जानकारी अनुसार १२ हजार ३८५ जनामा परीक्षण गरिएकामा सो संख्यामा संक्रमण पुष्टि भएको हो ।
नेपालमा संक्रमण दर १९.२ प्रतिशत पुगेको छ । सक्रिय संक्रमित २५ हजार ४९७ जना छन् । पाँच सयभन्दा बढी संक्रमित भएका जिल्ला १० र २०० भन्दा बढी संक्रमित भएका जिल्ला २० पुगेका छ ।
शुक्रबार १ हजार ३५१ जना संक्रमणमुक्त भएका छन् । हालसम्म सात लाख ४६ हजार ५६६ कोरोना संक्रमणमुक्त भएका छन् । नेपालमा संक्रमणमुक्त हुने दर ९५.३ प्रतिशत छ ।
संक्रमणबाट आज एकै दिन १० जनाको मृत्यु भएको छ । हालसम्म संक्रमणबाट ११ हजार १२ जनाको मृत्यु भएको छ । त्यस्तै ३८६ जना सघन उपचार कक्ष (आइसियु), ११७ भेन्टिलेटर, २३ हजार ९५० होम आइसोलेशन, एक हजार ५४७ संस्थागत आइसोलेशन र २३६ जना क्वारेन्टिनमा छन् ।
आज ६० हजार १५९ जनाले कोरोना विरुद्धको खोप लगाएका छन् । हालसम्म ६० लाख ८३ हजार १२४ जनाले पहिलो मात्रा र ५४ लाख सात हजार ३८० ले पूर्णमात्रा खोप लगाइसकेका छन् ।
