खलङ्गा । दादुराको सङ्क्रमण देखिएको जाजरकोटको रावतगाउँमा भेरी नगरपालिकाले स्वास्थ्यकर्मी पठाएर जाँच सुरु गरेको छ ।
यहाँका विद्यालयमा गएर सबै विद्यार्थीलाई दादुराको सङ्क्रमण भए/नभएका बारेमा जाँच गरिरहेको जनस्वास्थ्य निरीक्षक दीपक ओलीले बताउनुभयो ।
‘जाँचबाट थप दुई जनामा दादुरा सङ्क्रमण भएको फेला परेको छ’ उहाँले भन्नुभयो– ‘दादुरा सुरुवा रोग भएकाले गाउँ गाउँमा गएर बालबालिकामा सङ्क्रमणको अवस्था बुझ्ने क्रम सुरु भएको छ ।’
जनताको स्वास्थ्य नै मुख्य कुरा भएकाले गाउँमा स्वास्थ्यकर्मी परिचालन गरी घर घरमा उपचार सेवा सुरु गरिएको नगरप्रमुख चन्द्रप्रकाश घर्तीले बताउनुभयो ।
हप्ता दिनअघि मात्र रावतगाउँका दुई बालबालिकाको नमुना सङ्कलन गरी नेपालगञ्ज पठाइएकोमा सो नमुनामा दादुरा भएको पुष्टि भएको थियो । त्यसपछि नगरपालिकाले सो रोग नियन्त्रणका लागि स्वास्थ्यकर्मी परिचालन गरेको हो ।
नेपालले सन् २०१९ भित्र दादुरा उन्मूलन गर्ने लक्ष्य लिएको थियो तर यो रोगको सङ्क्रमण दर बढ्न थालेपछि सन् २०२३ मा उन्मूलनको लक्ष्य सारेको छ ।
