बाग्लुङ । बाग्लुङ चुनाव क्षेत्र नं २(ख) का प्रदेश सभा उम्मेद्वार खिमविक्रम शाहीले स्वर्गीय टेक बहादुर घर्तीको सपना साकार पार्न सबै एकजुट भएर लाग्नुपर्ने बताउनु भएको छ । बिहीबार निसीखोला गाँउपालिका–६ भलकोटमा भएको चुनावी सभालाई सम्बोधन गर्दै साझा वाम उम्मेद्वार शाहीले स्व. घर्ती एक विकासप्रेमी नेता भएको चर्चा गर्दै उहाँले छोडेका दायित्व अब आफूहरुले पुरा गर्ने प्रतिवद्धता व्यक्त गर्नुभएको हो ।
शाही मंसिर १४ गते हुने उप निर्वाचनमा स्व. टेकबहादुर घर्तीको चुनावी क्षेत्रबाट उम्मेद्वार बन्नुभएको हो । घर्ती एक इमान्दार तथा लोकप्रिय नेता हुनुहुन्थ्यो । कार्यक्रममा उम्मेद्वार शाहीले जिल्लाको भौगोलिक बिकटताले टाढा रहेको यहाँका जनताहरुले शिक्षा, स्वास्थ्य, खानेपानी, बिद्य्त जस्ता आधारभुत आवश्यकता पनि सहज रुपले प्राप्त गर्न नसकिरहेको उल्लेख गर्दै गति लिन नसकेका प्रदेशका गौरवका आयोजनाहरु उत्तरगंगा जलाशययुक्त विधुत आयोजना, सालझण्डी ढोरपाटन सडकलगायतका विकासका कामलाई तिब्रता दिन आफूले दबाब दिने बताउनुभयो ।
सभालाई सम्बोधन गर्दै राष्ट्रिय जनमोर्चा नेता एवं गण्डकी प्रदेशसभाका सांसद कृष्ण थापाले बागलुङ जिल्लामा बामपंथी जनमत अत्यधिक हुँदाहुँदै पनि विगतमा बामपंथी शक्तिहरु बिभाजित भएकोले अरुले फाइदा उठाएको बताउनुभयो । थापाले जनजिवीका, विकास र राष्ट्रिय स्वाधिनता कमजोर बन्दै गएको बताउँदै त्यसका लागि वाम उम्मेदवारलाई बिजयी बनाउन आग्रह गर्नु भयो ।
कार्यक्रमका अतिथि नेपाल कम्युनिष्ट पार्टी (नेकपा) का नेता शेरमान घर्तीले निसी, भुजी र तमानखोलाका जनताहरुको माग लिएर आफूले उम्मेद्वारी दिएको चर्चा गर्दै त्यो मागलाई पार्टीले सम्बोधन गर्ने सहमति गरेकोले अब आफ्नो पनि चुनाव चिन्ह गिलास रहेको धारणा राख्नुभयो । घर्तीले गिलास चिन्हमा मतदान गरि साझा बाम उम्मेदवार शाहीलाई बिजयी गराउन आव्हान पनि गर्नु भयो ।
कार्यक्रममा राष्ट्रिय जनमोर्चा बागलुङका सचिव भिमलाल पोखरेल, नेकपाका नेता प्रेम घर्ती, रुद्र प्रसाद पौडेल, केशर छन्त्याल, राष्ट्रिय जनमोर्चा निसीखोलाका अध्यक्ष थमन घर्ती ,सचिव मिलन हमाल लगायतले मन्तव्य राख्नु भएको थियो । कार्यक्रम लिला बहादुर बुढा मगरको अध्यक्षता, कुशल बुढाको सञ्चालन र सन्तोष बिकको स्वागत मन्तव्यमा सम्पन्न भएको थियो ।
चुनावी अभियानकै शिलशिलामा तीनै वटा पालिकाको विभिन्न वडाहरुमा निर्वाचन वडा परिचालन समितिको नेतृत्वमा घर दैलो तथा प्रचार प्रसार कार्य सञ्चालन भएका छन ।
