घोराही । राष्ट्रिय जनमोर्चा दाङले भारतले बनाएको जाली नक्सा विरुद्ध घोराहीमा प्रदर्शन गरेको छ । राजमो घोराही उपमहानगर समितिको आयोजनामा बिहीबार नारायणपुरमा कोणसभाको आयोजना गरी विरोध गरिएको हो ।
कोणसभालाई सम्बोधन गर्दै राष्ट्रिय जनमोर्चा दाङका अध्यक्ष गणेश आचार्यले भारतले विभिन्न माध्यमबाट नेपालको स्वाधिनता माथी बारम्बार धाबा बोल्ने काम गरेको भन्दै आपत्ति जनाउनुभयो ।
‘अहिले जसरी सुगौली सन्धी पछिको नेपाली सिमा मिच्ने र नेपाली भुभाग नै आफ्नो बनाउने काम गरेको छ, यदी यस्तै नै हो भने पूर्व टिस्टादेखि पश्चिम काँगडा सम्मको भुमिमा नेपालीले दाबी गर्नुपर्ने हुन्छ’ अध्यक्ष आचार्यले भन्नुभयो ।
कार्यक्रमलाई अखिल नेपाल जनजाती सम्मेलनका केन्द्रीय सदस्य रामबहादुर जि एम, अखिल नेपाल युवक संघ जिल्ला सदस्य डोर बहादुर केसी, अखिल छैठौं जिल्ला सदस्य लक्ष्मण बिक लगायतले सम्बोधन गर्नु भएको थियो ।
नगर अध्यक्ष हरि खरेलको अध्यक्षतामा भएको कार्यक्रमको सञ्चालन नगर समिती कोषाध्यक्ष चन्द्रबहादुर रावतले गर्नु भएको थियो ।
