काठमाडौं । गएको २४ घण्टामा देशभर १ हजार ७५६ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयले सार्वजनिक गरेको तथ्याङ्कअनुसार आज १४ हजार ३३४ जनामा परीक्षण गर्दा सो संखयामा संंक्रमण पुष्टि भएको हो । सक्रिय संक्रमितको संख्या ३३ हजार छ पुगेको छ ।
त्यस्तै, २ हजार २७४ जना संक्रमण मुक्त भएका छन् । हालसम्म सात लाख २३ हजार ४५६ जना संक्रमण मुक्त भएका छन् । बिहीबारको तुलनामा निको हुने दर आज पनि बढेको छ । लगातार दुई दिनदेखि संक्रमण मुक्त हुने दर बढेको छ । बुधबार ९४.१ प्रतिशत र बिहीबार ९४.२ प्रतिशत संक्रमण मुक्त हुने दर रहेकामा आज ९४.३ प्रतिशत पुगेको छ ।
यस्तै संक्रमणबाट आज २३ जनाको ज्यान गएको छ । हालसम्म १० हजार ८०९ जनाको संक्रमणबाट ज्यान गएको छ । नेपालमा प्रति १० लाखमा ३६४.३ जनाको संक्रमणको कारणले निधन हुने गरेको छ ।
त्यस्तै ५४० सघन उपचारकक्ष (आइसीयू), १५६ भेन्टिलेटर, ३० हजार ६६२ होमआइसोलेशन, दुई हजार ३४४ संस्थागत आइसोलेशन र २७४ जना क्वारेन्टिनमा छन् । नेपालमा संक्रमणको दर १९.५ प्रतिशत छ । पाँच सयभन्दा बढी संक्रमित हुने जिल्ला १९ वटा छन् । आज एक लाख ६४ हजार ३०२ जनाले कोभिड–१९ विरुद्धको खोप लगाएका छन् ।
