काठमाडौँ । नेपालमा अहिलेसम्म कोरोना विरुद्ध एक करोड ९२ लाख मात्रा खोप लगाइएको छ ।
२०७८ भदौ १६ गतेसम्म एक करोड ९२ लाख १०६ मात्रा खोप लगाइसकिएको स्वस्थ्य तथा जनसङ्ख्या मन्त्रालयले जनाएको छ ।
हालसम्ममा १७ दशमलव नौ प्रतिशतले खोपको पहिलो मात्रा र १५ दशमलव चार प्रतिशतले पूर्ण खोप लगाएका छन् ।
मन्त्रालयको तथ्याङ्कअनुसार ५४ लाख २४ हजार ८३६ जनाले पहिलो मात्रा र ४६ लाख ६७ हजार ३२८ जनाले पूर्ण खोप मात्रा लगाएका छन् । हालसम्म नेपालमा भोरोसेल, जोन्सन एन्ड जोन्सन, कोभिसिल्ड, जापानमा निर्मित अस्ट्राजेनेका र स्विडिस अस्ट्राजेनेका खोप भित्राइएको छ ।
त्यस्तै, मन्त्रालयले आगामी असोज मसान्तसम्म ३० प्रतिशत नागरिकलाई खोप लगाउने योजनानुसार खोप अभियान देशभर तीव्र रूपमा अघि बढाएको छ ।
यसैबिच, विश्व स्वास्थ्य सङ्गठनका दक्षिणपूर्वी एसियाका क्षेत्रीय निर्देशक डा. पुनम खेत्रपाल सिंहले नेपालले १० मिलियन खोपको मात्रा व्यवस्थापन गर्नुका साथै छोटो समयमै कोरोना विरुद्धको खोप लगाउनयोग्य नागरिकमध्ये १५ प्रतिशतलाई पूर्ण खोप लगाउन सफल भएकामा बधाइसमेत दिनुभएको छ । (रासस)
