मकवानपुरको भिमफेदी गाउँपालिका–८ का वडाध्यक्ष डाइभर्सिटी भिसा (डिभी) परेर अमेरिका गएपछि विगत सात महिनायता वडा कार्यालय नेतृत्वविहीन बनेको छ । चुनाव जितेका वडाध्यक्ष विदेश भासिँदा सार्वजनिक सेवा र विकास निर्माणको काम प्रभावित भएको छ ।
वडा सदस्य नवराज अधिकारीलाई कार्यवाहक अध्यक्षको जिम्मेवारी दिएर २०७५ चैत २७ गते वडा अध्यक्ष जगतमान घिसिङ परिवारसहित अमेरिका गएका हुन् ।
समयमै राजीनामासमेत नआएपछि त्यहाँ उपनिर्वाचनसमेत नहुने अवस्था रहेको जनाइएको छ । अध्यक्ष घिसिङको राजीनामा समयमा नआएकाले उपनिर्वाचनका लागि समस्या भएको निर्वाचन कार्यालयले जनाएको छ ।
वडाअध्यक्षको हस्तलिखित राजीनामा नआएसम्म मान्य नहुने भएकाले त्यहाँ उपनिर्वाचनको कुनै प्रकृया सुरु हुन सकेको छैन । राजीनामा हस्तलिखित नै आउनुपर्ने प्रवधान रहेको निर्वाचन आयोगले जनाएको छ ।
अध्यक्ष घिसिङ निर्वाचन जितेपछि डिभी परेर अमेरिका गएका थिए । उडेको पाँच महिनापछि मात्र घिसिङले गाउँपालिकामा इमेलमार्फत राजीनामा दिएको गाउँपालिका प्रमुख हिदम लामाले जानकारी दिए ।
सुरुमा अमेरिका गएको भन्दै तीन महिनाका लागि बिदा लिएका वडाध्यक्ष घिसिङ पाँच महिनासम्म पनि अमेरिकामै रहेको समाचार विभिन्न सञ्चारमाध्यममा आएपछि राजीनामा दिन बाध्य भएर इमेलमा राजीनामा पठाएको उनले जानकारी दिए । उनले भने, ‘घिसिङले इमेलमार्फत त राजीनामा पठाउनुभयो, तर हस्तलिखित राजीनामा पठाउन पनि आलटाल नै गर्नुभयो ।’
उक्त वडामा विसं २०७४ भएको वडाध्यक्षको निर्वाचनमा नेकपाका घिसिङले ५ सय ४१ मत ल्याएर जितेका थिए । अध्यक्ष घिसिङ निर्वाचन जितेपछि डिभी परेर अमेरिका गएका थिए ।
