काठमाडौं । मंसिरमा १४ गते हुने उपनिर्वाचनका लागि स्थानीय तहमा आज (बुधबार) मनोनयन दर्ता हुँदैछ । बिहान १० बजेदेखि दिउँसो १ बजेसम्म निर्वाचन अधिकृतको कार्यालयमा मनोनयन दर्ता गर्ने कार्यतालिका छ ।
स्थानीय तहअन्तर्गत एक नगरप्रमुख, तीन गाउँपालिका अध्यक्ष, एक गाउँपालिका उपाध्यक्ष र ४३ वडाअध्यक्षका लागि उपनिर्वाचन हुने छ । ३७ जिल्लामा हुने उपनिर्वाचनबाट प्रतिनिधिसभा सदस्य १, प्रदेशसभा सदस्य ३, स्थानीय तहको प्रमुख १, अध्यक्ष ३, उपाध्यक्ष १ र वडाअध्यक्ष ४३ पदमा जनप्रतिनिधि चुनिने छन् ।
बिभिन्न कारणले रिक्त ५२ पदका लागि मंसिर १४ गते उपनिर्वाचन हुन लागेको हो । प्रतिनिधिसभा र प्रदेशसभा तथा स्थानीय तहका लागि मनोनयन दर्ताको मिति अलग–अलग भए पनि मतदान भने सबैको मंसिर १४ गते नै हुनेछ ।
प्रतिनिधिसभा र प्रदेशसभा सदस्यको उपनिर्वाचनका लागि कात्तिक २१ गते नै मनोनयन दर्ता गरिएको थियो ।
उपनिर्वाचनमा भाग लिने दलहरूको संख्या १०१ छ । तीमध्ये सीके राउतको पार्टीसहित १६ नयाँ दल छन् ।
उपनिर्वाचनका लागि निर्वाचन आयोगले २४७ मतदानस्थल र ५३७ मतदान केन्द्र तोकेको छ । यस्तै मुख्य निर्वाचन अधिकृत ३७ र निर्वाचन अधिकृत ११ जना नियुक्त गरिएको छ ।
प्युठानको ऐरावती–२ मा राजमोका बिकले उम्मेद्वारी दिने
स्थानीय तहको उपनिर्वाचनमा राष्ट्रिय जनमोर्चाका तर्फबाट प्युठानको ऐरावति गाउँपालिकाको २ नं. वडा अध्यक्षको लागि भक्त बहादुर बिकले उम्मेद्वारी दर्ता गर्दै हुनुहुन्छ ।
राजमो र नेकपाबीच भएको चुनावी तालमेल अनुसार बिकले वाम गठबन्धनको साझा उम्मेद्वारका रुपमा उम्मेद्वारी दिन लाग्नुभएको हो ।राजमोले स्थानीय तहका अन्य स्थानमा भने नेकपाका उम्मेदवारलाई सघाउनेछ ।
दुई दलबीच भएको सहमति अनुसार नै प्रदेश सभा अन्तर्गत बाग्लुङको २(ख) मा राजमोका तर्फबाट खिमविक्रम शाहीलाई उम्मेद्वार बनाइएको छ ।
