काठमाडौं । प्रधानमन्त्री केपी शर्मा ओलीको आज (आइतबार) तेस्रोपटक मिर्गौलाको डायलासिस हुँदैछ । त्यसका लागि ओली आज ग्रान्डी अस्पताल जाँदै छन् ।
यसअघि प्रधानमन्त्री ओलीले ग्रान्डीमा दुई पटक डायलासिस गराइसकेका छन्। नेकपा अध्यक्षसमेत रहेका प्रधानमन्त्री ओलीले हिजो (शनिबार) बसेको नेकपा सचिवालय बैठकमा मिर्गौलाले राम्रोसँग काम नगरेको र फोक्सोमा पानी जमेकाले ग्रान्डी अस्पतालमा गएर दुईपटक डायलासिस गराएको जानकारी दिएका थिए । ओलीले आफू सिकिस्त बिरामी नभएको तर मिर्गौलाले राम्रोसँग काम नगरेकाले अब नियमित डायलासिस वा पुनः प्रत्यारोपण मात्र विकल्प रहेको स्पष्ट पारेका छन् ।
ग्रान्डीमा गरिएका स्वास्थ्य जाँचका केही रिपोर्ट आउन बाँकी रहेको र ती आइसकेपछि डाक्टरले फाइनल गर्ने उनको भनाइ छ।
प्रधानमन्त्री ओलीको १२ वर्षअघि मिर्गौला प्रत्यारोपण गरिएको थियो। त्यसयता नियमित औषधि खाइरहेका उनी स्वास्थ्य परीक्षणका लागि गत साउन १८ गते सिंगापुर गएका थिए । पुनः भदौ ५ गते सिंगापुर गएर त्यहाँको नेसनल युनिभर्सिटी अस्पतालमा फेरिसस प्लाज्माफेसेसिस प्रक्रियामार्फत रगतमा भएको ‘एन्टीबडी’ निकालेर उनी भदौ २० मा स्वदेश फर्किएका थिए ।
त्यसपछि अहिले उनको स्वास्थ्यमा फेरि समस्या सुरु भएको हो । यसै क्रममा प्रधानमन्त्री ओली स्वास्थ्य जाँचका लागि यही कात्तिक २ गते ग्रान्डी अस्पताल पुगेका थिए । मिर्गौला सुन्निएको पाइएपछि क्याथेटर राखिएको थियो ।
बुधबार फेरि अस्पताल गएका उनको आकस्मिक डायलासिस गरियो। पुनः बिहीबार दोस्रोपटक डायलासिस गराएर सरकारी निवास फर्किएका प्रधानमन्त्रीको आज तेस्रोपटक डायलासिस गराउन लागिएको हो।
प्रधानमन्त्री ओली डायलासिसका लागि अस्पताल जाने भएपछि आज बस्ने भनिएको मन्त्रिपरिषद् बैठक पनि प्रभावित हुने स्रोतको भनाइ छ ।
