काठमाडौं । यौन दुराचारको आरोपमा पक्राउ परेका पूर्वसभामुख कृष्णबहादुर महराको शुक्रबार काठमाडौं जिल्ला अदालतमा बयान लिइएको छ । महराको थुनछेक बहस आज हुने भनिएपनि समय अभावका कारण आज बहस हुन सकेन ।
संसद् सचिवालयमा कार्यरत महिला कर्मचारीलाई बलात्कार गर्न खोजेको आरोपमा सरकारी निवासबाटै पक्राउ परेका महराको थुनछेक बहस आज नहुने भएपछि आइतबारसम्म महरा प्रहरी हिरासतमै रहनेछन् ।आइतबारको थुनछेक बहसपछि मात्रै उनी छुट्ने, धरौटीमा रिहा हुने वा पुर्पक्षका लागि कारागार चलान गर्ने अदालतले फैसला गर्नेछ।
महरालाई जिल्ला सरकारी वकिलको कार्यालय काठमाडौंले बिहीबार बलात्कार प्रयास गरेको अभियोगमा अदालतमा मुद्दा दायर गरेको थियो।
आजै थुनछेक बहस हुने भनिए पनि शुक्रबार बयानमात्रै लिइने अदालत स्रोतले जानकारी दिएको हो।
शुक्रबार महराको बयान जिल्ला अदालतका मुख्य न्यायाधीश सुदर्शनराज पाण्डेको इजलासमा भएको हो । उक्त इजलासमा बयान जारी रहँदा सुरक्षाकर्मी र कानुन व्यवसायीलाई मात्रै प्रवेश दिइएको थियो । बयानका क्रममा महराले फोनमा कुरा गरे पनि महिला कर्मचारीको कोठामा भने नगएको बयान दिएका छन् ।
