काठमाडौं । संसद सचिवालयकी कर्मचारीमाथि बलात्कार प्रयास गरेको आरोपमा थुनामा रहेका निवर्तमान सभामुख कृष्णबहादुर महराविरुद्ध प्रहरीले प्रमाणसहितको अनुसन्धान प्रतिवेदन तयार पारेको छ । महराले जबर्जस्ती करणी उद्योग गरेको प्रमाणसहितको अनुसन्धान प्रतिवेदन शुक्रबार सरकारी वकिलको कार्यालयमा बुझाएको छ ।

महानगरीय प्रहरीका अनुसार आज प्रहरीले आफ्नो अनुसन्धान पुरा गरी सरकारी वकिललाई प्रतिवेदन बुझाएको हो । ‘हामीले सरकारी वकिललाई करणी उद्योगको प्रमाणसहितको प्रतिवेदन बुझाएका छौँ । अब थप केही बझ्नुपर्ने भए सरकारी वकिल कार्यालयले मागे अनुसार हुनेछ’ प्रहरी स्रोतले भन्यो । प्रहरीले अनुसन्धानका क्रममा शाहीको कोठामा बरामद भएको महराको फुटेको चश्मा, गिलास, बोत्तल लगायतका सामग्रीको फरेन्सिक जाँच गरिएको दाबी गरेको छ ।

प्रहरीले मुलुकी अपराध संहिताको परिच्छेद १८ अनुसार १८ वर्ष पुगेकी महिलालाई जबर्जस्ती करणी उद्योगमा आधा सजाय हुने व्यवस्था अनुसार नै राय दिएको प्रहरीले जनाएको छ। जबर्जस्ती करणीमा यो परिच्छेदअनुसार सातदेखि १० वर्ष सजाय हुने व्यवस्था छ। करणी उद्योगमा आधा सजाय हुने व्यवस्था अनुसार महरा दोषी प्रमाणित भए साढे ३ देखि ५ वर्षसम्म सजाय हुनेछ। सो प्रतिवेदनमा महरामाथि जबजरस्ती करणी उद्योगमा कैद तथा जरिवाना माग गरिएको प्रहरीले जनाएको छ।

संसद सचिवालयकी कर्मचारी शाहीमाथि बलात्कारको प्रयास गरेको आरोपमा प्रहरीले महरालाई गत असोज १९ गते सभामुख निवासबाटै पक्राउ गरेको थियो। थप अनुसन्धानका लागि बिहीबार अदालतबाट तेस्रोपटक ७ दिनको म्याद थप गरिएको थियो ।