काठमाडौं । नेपाली कांग्रेसका केन्द्रीय सदस्य तथा प्रतिनिधिसभा सदस्य देवेन्द्रराज कँडेलले आफूसँग भारतीय नागरिकता वा मतदाता परिचयपत्र नभएको स्पष्टिकरण दिएका छन् । बुधबार पार्टी कार्यालय सानेपामा पत्रकार सम्मेलन गरी कँडेलले समाचारहरुमा आए जस्तो भारतीय नागरिकता नभएको बताएका हुन् ।
तर, कँडेलले आफूसँग भारतीय सवारीचालक अनुमति पत्र रहेको स्विकार गरेका छन् ।
अहिले भएको सवारी चालक अनुमति पत्र भारतमा अध्ययन गरेको समयमा शैक्षिक योग्यताको प्रमाणपत्रका आधारमा बनाएको उनको भनाई छ । यस्तै उनले नवरलपरासीको सीमावर्ती भारतीय सहरमा आफ्नी हजुरआमाले स्थापना गरेको राधाकुमारी ईन्टर कलेजको सञ्चालक समितिको चुनावमा मतदान गरेको पनि बताएका छन् ।
कँडेलले आफ्नी हजुरआमाले खोलेको क्याम्पसको अध्यक्ष भएकै कारण भारतको उच्च अदालतमा आफूविरुद्ध नेपाली नागरिकले भारतीय संघसंस्थामा अध्यक्ष हुन नपाउने भनेर मुद्दा चलिरहेको दाबी पनि गरे ।
पूर्व गृह राज्यमन्त्री कँडेल भारतीय नागरिक भएको समाचार हालै सार्वजनिक भएको थियो । उनी विरुद्ध भारतीय अदालतमा अपहरण मुद्दासमेत चलिरहेको सञ्चारमाध्यमले खुलासा गरेका थिए ।
