काठमाडौं । गैरआवासीय नेपाली संघ (एनआरएनए) को नवौं विश्व सम्मेलन तथा अन्तर्राष्ट्रिय महाधिवेशन मंगलबारदेखि काठमाडौंमा सुरु हुँदै छ ।
होटेल ह्यात रेजेन्सीमा आयोजना हुन लागेको विश्व सम्मेलनको उद्घाटन राष्ट्रपति विद्यादेवि भण्डारीले गर्ने कार्यक्रम छ । कार्यक्रममा प्रधानमन्त्रीको समेत उपस्थिति हुने आयोजकले जानकारी दिएको छ ।
सम्मेलनमा सहभागी हुन विभिन्न देशमा पेसा(व्यवसाय गरेका २५ सय प्रतिनिधि काठमाडौंमा भेला भएका छन् । आजदेखि असोज ३० गतेसम्म चल्ने महावधिवेशनले गैरआवासीय नेपाली संघ (एनआरएनए)को नयाँ नेतृत्व चयन गर्नेछ ।
अध्यक्ष पदमा हालका उपाध्यक्षद्वय कुमार पन्त र कुल आचार्यले उम्मेदवारी घोषणा गरिसकेका छन् । आचार्यको बेलायत तथा पोर्चुगलमा चेन रेष्टुराको व्यवसाय छ भने पन्त जर्मनीको फ्रैंकफर्टमा होटल तथा रेष्टुरा व्यवसाय सञ्चालन गर्छन्।
अध्यक्ष, पाँच उपाध्यक्ष, महासचिव, दुई सचिव, कोषाध्यक्ष, सहकोषाध्यक्ष, महिला संयोजक, युवा संयोजक, पाँचजना क्षेत्रीय संयोजक तथा उपसंयोजक, महिला र युवा उपसंयोजक गरी २५ पदमा निर्वाचन हुनेछ।
‘म, मेरो एनआर एन ए र मेरो नेपाल’ मूल नारा रहेको विश्व सम्मलेन नेपाल सरकार, नेपाल उद्योग वाणिज्य महासंघ र गैरआवासीय नेपाली संघको संयुक्त आयोजनामा हुनेछ।
