जनकपुर । विमान उडान ढिलाई गरेको भन्दै सांसद प्रमोदकुमार साहले जनकपुर विमानस्थलमा रहेको बुद्ध एयरको काउन्टर तोडफोड गरेका छन् । राष्ट्रिय जनता पार्टी(राजपा) का सांसद साहले सोमवार दिउँसो ११ः४० बजेको बुद्ध एयरको जहाज तीन घण्टा ढिला भएको भन्दै काउन्टरमा लातले हानेका थिए । साहले काउन्टरमा लात हानेपछि काउन्टरको सिसा फुटेको छ।
उक्त विमानमा समयमै काठमाडौंको अस्पतालमा पुग्नुपर्ने किड्नीका बिरामी भएको र आफूले त्यसबारे पटक–पटक विमान कम्पनिका कर्मचारीलाई भन्दा पनि सुनुवाई नगरेकाले आक्रोशित भएको सांसद साहले बताए । साह सर्लाही १ बाट निर्वाचित सांसद हुन्
यता, तोडफोड गर्नेलाई सात दिनभित्र कानुनी कारबाही नभए सबै उडान बन्द गर्ने नेपाल वायुसेवा सञ्चालक संघले चेतावनी दिएको छ। संघले एक प्रेस विज्ञप्ति जारी गर्दै यदि कारबाही नभए असुरक्षाको कारण उडान बन्द गरिने जानकारी गराएको छ।
प्रहरीले भने साहलाई कारबाही गर्ने जनाएको छ । २ नम्बर प्रदेश प्रहरी प्रमुख प्रहरी नायब महानिरीक्षक प्रद्युम्न कार्कीले सांसद प्रमोदकुमार साहलाई कानुनअनुसार कारबाही गरिने बताएका छन् । त्यसका लागि उजुरी दिन उनले बुद्ध एयरका कर्मचारीसँग आग्रह गरे ।
