नयाँ दिल्ली । भारतको असम राज्यमा एक लाख भन्दा धेरै नेपाली भाषीलाई ‘अनागरिक’ बनाइएकोप्रति दिल्लीमा विरोध प्रदर्शन भएको छ । भारतमा हालै गरिएको राष्ट्रिय नागरिक पञ्जीकरण (एनआरसी) बाट नेपाली भाषीलाई बञ्चित गरिएको भन्दै एनआरसीमा समावेश गर्न मागसहित प्रदर्शन भएको हो ।
सोमबार दिल्लीको मण्डि हाउसबाट जन्तरमन्तरसम्म विरोध प्रदर्शन तथा सभाको आयोजना गरिएको छ । ‘एनआरसी एवं फासीवाद विरोधी जनमोर्चाले आयोजना गरेको विरोध प्रदर्शनमा मूलप्रवाह अखिल भारत नेपाली एकता समाजसहितका भाइचारा संगठनहरु सहभागी छन्।
विरोध प्रदर्शनपछि आयोजित जनसभालाई सम्बोधन गर्दै मूलप्रवाह अखिल भारत नेपाली एकता समाजका सचिव ठाकुर खनालले शताब्दियौँदेखि बसोबार गर्दै आएका लाखौं नेपाली भाषी नागरिकहरुलाई भारतीय ‘अनागरिक’ बनाएर भारतबाट लखेट्न खोजेको बताउनुभयो । भारतस्थित नेपालीहरुको समस्या समाधान गर्न आफ्नो संगठनले जुनसुकै मूल्य चुकाउन तयार रहेको भन्दै सचिव खनालले प्रवासमा रहेका नेपालीहरुको समस्याप्रति नेपाल सरकार मौन बसेकोमा आक्रोश समेत व्यक्त गर्नुभयो ।
मूलप्रवाह अखिल भारत नेपाली एकता समाजका सचिव ठाकुर खनालको भनाई । (भिडियाे हेर्न क्लिक गर्नुहाेस्)
कार्यक्रममा भाकपा (माले) का महासचिव के एन रामचन्द्रनले सम्बोधन गर्दै स्वतन्त्रता संग्राममा रगत दिएका नेपालीभाषीलाई भारत सरकारले एनआरसी पञ्जिकरणबाट बञ्चित गराउन नमिल्ने जिकिर गर्नुभयो । कार्यक्रममा मुल प्रवाह अखिल नेपाल भारत नेपाली एकता समाजका उपाध्यक्ष हिरा सिंह चन्द, तथा भारतस्थित भाइचारा संगठनका प्रतिनिधिहरु डा मजुर आलम, राधेश्याम, ज्योती दामोदर, विमल त्रिवेदी लगायतले सम्बोधन गर्नुभएको थियो ।
विरोध सभाको अध्यक्षता अरुण माझीले गर्नुभएको मूलप्रवाह सुदुरपश्चिम उत्तर क्षेत्रीय सचिव तथा केन्द्रीय सदस्य त्रिभुवन भट्टराइले जानकारी दिनुभयो ।
प्रदर्शनमा मूलप्रवाहसहित भाकपा (माले) रेडस्टार, न्यु डेमोक्रेटिक पार्टी अफ इन्डिया, बहुजन कम्युनिष्ट पार्टी, आल इन्डिया मिल्ली काउन्सिल, सर्वहारा लोकपक्ष, सीपीआई (एम एल) न्यु प्रोलेटारिन, लोक समिति, लोकपक्ष, सिटीजन फर डेमोक्रेसी, डेमोक्रेटिक पिपुल लायर्स एशोसिएशन, आल इन्डिया पिस मिसन, भगत सिंह मञ्च, आल इन्डिया क्रिश्चियन माइनारिटी फ्रन्टलगायत सहभागी छन् ।
अर्काे भिडियाे यहाँ हेर्नुहाेस्
