नयाँ दिल्ली । भारतको असम राज्यमा हालै भएको राष्ट्रिय नागरिक पञ्जीकरण(एनआरसी) बाट एक लाख बढी नेपाली भाषीलाई बञ्चित गरिएकोमा दिल्लीमा विरोध प्रदर्शनको तयारी गरिएको छ ।
असोज २७ गते (अक्टुवर १४) मा दिल्लीको मण्डि हाउसबाट जन्तरमन्तरसम्म विरोध प्रदर्शन गर्न लागिएको हो । प्रदर्शनमा मूलप्रवाह अखिल भारत नेपाली एकता समाजसहित भाइचारा पार्टीहरु सहभागि हुने मूलप्रवाहका उपाध्यक्ष कपिल खनालले जानकारी दिनुभएको छ ।
‘एनआरसी एवं फासीवाद विरोधी जनमोर्चा’ गठन गरेर प्रदर्शनको तयारी गरिएको हो । प्रदर्शनमा मूलप्रवाहसहित भाकपा (माले) रेडस्टार, न्यु डेमोक्रेटिक पार्टी अफ इन्डिया, बहुजन कम्युनिष्ट पार्टी, आल इन्डिया मिल्ली काउन्सिल, सर्वहारा लोकपक्ष, सी.पी.आई. (एम एल) न्यु प्रोलेटारिन, लोक समिति, लोकपक्ष, सिटीजन फर डेमोक्रेसी, डेमोक्रेटिक पिपुल लायर्स एशोसिएशन, आल इन्डिया पिस मिसन, भगत सिंह मञ्च, आल इन्डिया क्रिश्चियन माइनारिटी फ्रन्टलगायत सहभागी हुनेछन्।
आसाममा हालै गरिएको एनआरसीबाट एक लाख नेपाली भाषी भारतको नागरिकताबाट वञ्चित हुने अवस्था देखिएको छ। उनीहरु कैयौं पुस्तादेखि भारतमा बसोबास गर्दै आएका नागरिक हुन्।
नेपाली भाषीलाई कहिले भुटानबाट खेदाउने त कहिले बर्माबाट खेदाउने गरिएको र अहिले आसामबाट खेदाउने षडयन्त्र भएको मूलप्रवाहका उापध्यक्ष खनालले बताउनुभयो । एक लाख बढी नेपालभाषी अनागरिक बनाउने प्रयासविरुद्ध नेपाल सरकार बोल्नुपर्ने र भारतलाई आवश्यक दबाब दिनुपर्नेमा पनि उपाध्यक्ष खनालले जोड दिनुभयो । भारतमा पनि सत्तारुढ नेकपा र विपक्षी नेपाली कांग्रेस लगायत दलका भातृ संगठन भएपनि उनीहरु यति ठुलो समस्यामा मौन बसेका खनालको भनाई छ ।
