काठमाडौँ । राष्ट्रिय जनमोर्चाका महासचिव जनकराज शर्माले देश राजाले नभएर जनताले बचाउने बताउनुभएको छ । राजावादीहरूले देशैभरि “राजा आऊ, देश बचाऊ” भन्दै नाराबाजी गरिरहेको सन्दर्भमा उहाँले यस्तो अभिव्यक्ति दिनुभएको हो ।
राष्ट्रिय जनमोर्चा काठमाडौँको आयोजनामा २०७७ मङ्सिर २५ गते माइतीघर मण्डलामा आयोजित विरोधसभामा मन्तव्य राख्दै राजमो महासचिव शर्मा राजतन्त्रको पुनस्र्थापना समाज विकासको वैज्ञानिक नियम विपरीत भएको बताउनुभयो । ‘संसार दासयुग, सामन्ती युग हुँदै पुँजीवादमा विचरण गरिरहेको छ’ शर्माले अगाडि भन्नुभयो– ‘अहिले राजावादीहरूले पुनः राजतन्त्र फर्काउन खोज्नु देशलाई पश्चगमनतिर लैजानु हो ।’
अहिले राजावादीहरूले देशैभरि जुलुस गरिरहेको सन्दर्भमा महासचिव शर्माले उनीहरूलाई सो सुविधा यही लोकतान्त्रिक गणतन्त्रले दिएको बताउनुभयो । ‘तपाईंहरूको शासनकालमा बोल्न पाइन्थ्यो र ? कोही कसैले जनताको पक्षमा दुई शब्द बोल्यो भने त सामाजिक सुरक्षा ऐन लगाएर जेलमा कोचिन्थ्यो, फाँसीमा झुण्ड्याइन्थ्यो।’ उहाँले अहिलेका केही किशोरकिशोरीले राजतन्त्रको निरङ्कुशता नबेहोरे पनि आम जनताले अझै नबिर्सेको बताउनुभयो ।
राजावादीहरूले भ्रष्टाचारको प्रसङ्ग उठाएकोेमा नेता शर्माले राजाको प्रत्यक्ष शासनमा पनि चरम भ्रष्टाचार भएको स्मरण गर्न आग्रह गर्नुभयो । ‘राजावादीहरूले भ्रष्टाचारको कुरा उठाएका छन्’ शर्माले भन्नुभयो– ‘यस्तो महामारीका बेला पनि स्वास्थ्य सामग्रीमा भ्रष्टाचार हुनु दुःखद् छ, यसको छानबिन गरिनुपर्दछ ।’ उहाँले अगाडि भन्नुभयो– ‘तर अहिले भएको भ्रष्टाचारको नाममा राजावादीहरूले आफ्नो प्रत्यक्ष शासनकालमा भएको चरम भ्रष्टाचारलाई बिर्सिनु हुँदैन ।’
राष्ट्रिय जनमोर्चा धर्म निरपेक्षताको पक्षमा रहेको बताउँदै उहाँले भन्नुभयो– ‘धर्म निरपेक्षता कुनै धर्मको विरोध होइन, त्यो सबै धर्म मान्न पाउने स्वतन्त्रता हो ।’ उहाँले राजावादीहरूले धर्म निरपेक्षतालाई हिन्दु धर्म विरोधी अवधारणाको रूपमा प्रस्तुत गरिएकोमा आपत्तिसमेत प्रकट गर्नुभयो ।
कार्यक्रममा अर्का अतिथि राजमो केन्द्रीय उपाध्यक्ष, प्रवक्ता तथा प्रतिनिधि सभाकी सांसद दुर्गा पौडेलले अहिलेको गणतन्त्र राजावादीहरूले भनेजस्तो दुईचार जना नेताहरू कोठामा बसेर ल्याएको नभएको बताउनुभयो । ‘यो लोकतान्त्रिक गणतन्त्र जनताको दशकौँ लामो रक्तरञ्जित बलिदानबाट प्राप्त भएको हो’ उहाँले राजावादीहरूलाई चेतावनी दिनुभयो– ‘जनताको रगतसित साटेर ल्याएको गणतन्त्र कसैले मास्न पाउने छैन ।’ उहाँले गणतन्त्रको रक्षाका लागि सिङ्गो मुलुक पुनः एकजुट हुने विश्वास व्यक्त गर्नुभयो ।
राजाले राष्ट्रियताको रक्षा गर्छन् भन्ने विश्वास झुट बताउँदै राजमो नेतृ पौडेलले कालापानी प्रकरण नै यसबारे काफी भएको बताउनुभयो । ‘कालापानीमा भारतीय सेना राजतन्त्रकै बेलामा बसेको हो’ उहाँले भन्नुभयो– ‘कालापानीमा भारतीय अतिक्रमणलाई राजावादीहरूले दिएको स्वीकृतिलाई बिर्सेर आफूहरूलाई कथित राष्ट्रवादी भएको दावी गर्नुको कुनै औचित्यता छैन ।
सङ्घीयताले जनतामाझ विद्वैष फैलाउँदै गएको बताउँदै राजमो उपाध्यक्ष तथा प्रवक्ता पौडेलले यसलाई तत्कालै खारेज गर्नुपर्ने बताउनुभयो । ‘सङ्घीयताले देश खारेज गर्दै छ’ उहाँले भन्नुभयो– ‘देशै खारेज भए हामी नेपाली रहने छैनौँ ।
उहाँले राजावादीहरूले सङ्घीयताको विकल्प राजतन्त्र बताएकोमा उहाँले प्रतिवाद गर्नुभयो । उहाँले भन्नुभयो– ‘सङ्घीयताको विकल्प राजतन्त्र होइन, प्रजातान्त्रिक विकेन्द्रीयता र स्थानीय स्वायत्त शासनमाथि आधारित एकात्मक लोकतान्त्रिक गणतन्त्र हो ।’
कार्यक्रममा अखिल नेपाल महिला सङ्घकी अध्यक्ष मीना पुन, नेकपा (मसाल) बागमती प्रदेशका प्रवक्ता समीर सिंह र अखिल (छैठौँ) का केन्द्रीय सचिव सुवास जिसीले पनि मन्तव्य राख्नुभएको थियो ।
राजमो काठमाडौँका अध्यक्ष झविन्द्र बेलबासेको अध्यक्षतामा अगाडि बढेको सो कार्यक्रमको सञ्चालन राजमो काठमाडौँका सल्लाहकार लक्ष्मणदेव पाण्डेले गर्नुभएको थियो ।