दमौली । दशैँको टिकाको दिन चितुवाको आक्रमणबाट तनहुँमा एक बालकको ज्यान गएको छ । तनहुँको भानु नगरपालिका–१ जामुनेगैह्राका चार वर्षीय आशिष बानियाँलाई मंगलबार साँझ चितुवाले आक्रमण गरेको हो ।

घरमै पिङ खेलिरहेका बालकलाई चितुवाले आक्रमण गरेपछि उपचारका क्रममा ज्यान गएको जिल्ला प्रहरी कार्यालय तनहुँले जनाएको छ ।

भानु नगरपालिकामा यसअघि पनि चितुवाको आक्रमणबाट बालबालिकाको मृत्यु भएको छ ।

यसअघि असोज १५ गते भानु नगरपालिका–२ स्थित सामुदायिक वनमा निर्माण गरिएको खोरमा एउटा चितुवा नियन्त्रणमा लिइएको थियो । घटनापछि चितुवाले पुनः आक्रमण गर्न थालेपछि स्थानीयवासी त्रसित छन् ।