काठमाडौं । सशस्त्र प्रहरीले दशैंका तीन दिन उपत्यकामा निःशुल्क बस सेवा सञ्चालन गर्ने भएको छ । निःशुल्क बस सेवा बडादशैंको नवमी, दशमी र एकादशीका दिन बिहान ८ बजेदेखि सञ्चालन हुने सशस्त्र प्रहरीले जनाएको छ ।
एउटा बस सशस्त्र प्रहरी बल नेपाल प्रधान कार्यालय हल्चोकबाट यात्रुको सेवामा निस्कने छ । सो बसले ठूलो भर्याङ, बनस्थली, वालाजु हुँदै विभिन्न ठाउँका स्थानीय यात्रुहरुलाई सेवा प्रदान गर्ने छ ।
दोस्रो बस पनि सशस्त्र प्रहरी बल नेपाल प्रधान कार्यालय हल्चोकबाटै निस्कने छ र त्यसले सितापाइला, कलंकी, बल्खु हुँदै विभिन्न ठाउँका यात्रुहरुलाई निःशुल्क सेवा प्रदान गर्ने छ ।
बडादशैंको बेला सार्वजनिक यातायातका साधनहरु कम चल्ने भएकोले सर्वसाधारणको आवतजावतमा सुविधा पुर्याउने उद्देश्यले निःशुल्क बस संचालन गर्न लागिएको एपीएफले जनाएको छ ।
नेपाली सेनाले पनि दशैँको टिकाको दिनमा काठमाडौं उपत्यकामा २१ वटा बसबाट निःशुल्क सेवा दिने जनाएको छ ।
यसैबीच सशस्त्र प्रहरीले वडादशैंको अवसरमा देशका विभिन्न ठाउँहरुमा १३४ पिङ बनाइदिएको छ । सर्वसाधारणहरु पिङ खेलेर रमाइलो गरुन् भन्ने उद्देश्यले सार्वजनिक स्थलहरुमा पिङ हालिएको हो ।
