काठमाडौं । बारामा मदिरा भट्टीको खाल्डोमा डुबेर पाँच जनाको मृत्यु भएको छ।
फेटा गाउँपालिका–४ बतरा गाउँमा मदिरा उत्पादन गर्ने भट्टीको खाल्डोमा डुबेर एकै घरका चारसहित पाँच जनाको मृत्यु भएको प्रहरीले जनाएको छ।
मृत्यु हुनेमा भट्टी सञ्चालक ४० वर्षीय जोगा मुखिया, उनकी १२ वर्षीया छोरी सुमनकुमारी, जोगाका भाइ ३५ वर्षीय महेन्द्र मुखिया, महेन्द्रकी पत्नी ३० वर्षीया लालकुमारी देबी र करिब ५० वर्षीय एक भारतीय नागरिक रहेका जिल्ला प्रहरी कार्यालय बाराले जनाएको छ ।
घटनाको विषयमा स्थानीयले खबर गरेपछि प्रहरी घटनास्थल पुगेको थियो।
मुखिया परिवारले लामो समयदेखि अबैद्य रुपमा घरमै मदिरा उत्पादन गर्दै आएका थिए। मदिरा उत्पादन गर्न घरभित्रै खाल्डो तयार गरेको थियो। दुईमध्ये कच्चा पदार्थसहितको पानी जमेको एउटा खाल्डोमा उनीहरु पाँचैजना डुबेका हुन्।
दुई साता अघि प्रहरीले भट्टी भत्काएर कच्चा पदार्थ नष्ट गरे पनि उनीहरुले फेरि मदिरा बनाउन भट्टी तयार गरेका थिए।
बुधबार राति करिब ८ बजे पाँचै जना करिब पाँच फिट गहिरो एउटै खाल्डोमा डुबेका हुन्। पाँचै जनाको खाल्डोमै मृत्यु भएको प्रहरीले जनाएको छ।
खाल्डोमा रहेको पानीमा प्रवाह भएको करेन्टको कारण उनीहरुको मृत्यु भएको हुनसक्ने अनुमान प्रहरीले गरेको छ।
