काठमाडौं । पुनर्वहालीको माग गर्दै आन्दोलनरत कृषि तथा पशु सेवा विभागअन्तर्गतका प्राविधिकहरुको समस्या समाधान गर्न सरकारले कार्यदल गठन गरेको छ । मंगलबार कृषि तथा पशुपंक्षि मन्त्रालयमा आन्दोलनरत पक्षका तर्फबाट गएको डेलिगेशन टोलीसँगको वार्तापछि मन्त्रालय कार्यदल गठन गर्न सहमत भएको अखिल नेपाल ट्रेडयुनियन महासंघ अन्टुक) का महासचिव लोकराज भुसालले जानकारी दिनुभयो ।
मन्त्रालयका सहसचिव रघुराम विष्टको संयोजक्त्वमा सरोकारवालाहरुको सहभागितामा नौ सदस्यीय कार्यदल गठन गर्ने निर्णय भएको हो । सो अवसरमा कृषि तथा पशुपंक्षि विकासमन्त्री चक्रपाणी खनालले समस्या समाधान गर्न आफू प्रतिवद्ध रहेको बताउनुभयो ।
अर्थ मन्त्रालयको भदौ २९ को निर्णय अनुसार कृषि तथा पशु सेवा प्राविधिकहरुलाई पदमुक्त गरिएपछि उनीहरु आन्दोलित हुँदै आएका छन् । २०७२ सालदेखि एक गाउँ एक प्राविधिक रूपमा करारमा कार्यरत तीन हजार कृषि तथा पशु सेवा प्राविधिकलाई सरकारले हटाएपछि पुनर्वहालीको माग गरेका हुन् त्यसक्रमा उनीहरुले सत्तारुढ दल नेकपा र प्रमुख प्रतिपक्षी दल नेपाली कांग्रेसको पार्टी कार्यालयमा धर्ना समेत दिएका थिए।
यसैक्रममा सोमबार पनि उनीहरुले माइतिघर मण्डलामा प्रदर्शन गरेका थिए । प्रदर्शनपछि आयोजित कोणसभालाई सम्बोधन गर्दै नेभ्लाका पुर्व अध्यक्ष एवं सल्लाहकार, विश्व ट्रेड युनियन महासंघ समन्बय समिति नेपालका सदस्य तथा अखिल नेपाल ट्रेडयुनियन महासंघ (अन्टुक)का महासचिव लोकराज भुसालले सरकारको सो निर्णयबाट अन्नायमा परेका पेशाकर्मिहरुको सेवाको निरन्तरता मात्र होइन ग्रामिण कृषकहरुको सेवाको निरन्तरताको लागि सरकारसँग आग्रह गर्नुभएको थियो ।
