प्रतिनिधिसभाका सभामुख कृष्णबहादुर महरामाथि ‘जवरजस्ती करणी’को आरोप लगाएकी महिलाले बोली फेरेकी छन् । संसद सचिवालयमा कार्यरत कर्मचारी रोशनी शाहीले मंगलबार नागरिकखबरलाई दिएको भिडियो अन्तर्वार्तामा सभामुख महरा आफ्नो कोठामै नआएको बताएकी छन् ।
उनले महरा आफ्नाे बुवासमानकाे ब्यक्ति भएकाे र उमेरमा पनि बुवा जस्तै भएकाे बताएकी छन् ।
उनले सभामुख महराले आफूमाथि कुनै पनि दुव्र्यवहार नगरेको दावी समेत गरेकी छन् । ‘त्यो दिन मेरो कोठामा कोही आएको छैन । महरा सरसँग संसद सचिवालयमा कहिले काँही बीपी चेक गराउँदा भेट हुने हो’, उनले भनिन्, ‘अहिले त धेरै भयो भेट पनि नभएको ।’
शाहीले आफूले डिप्रेसनको औषधी सेवन गरिररहेको र कर्मचारी समायोजनको क्रममा चाहेको ठाउँमा नपर्दाको रिसले आफूले गलत आरोप लगाएको बताएकी छिन् । शाहीले आफूले विगत आठवर्षदेखि डिप्रेसनको औषधि सेवन गरिरहेको बताइन् । ‘म आठ वर्षदेखि डिप्रेसनमा छु । आमाको निधनपछि डिप्रेसनमा छु । नियमति औषधि सेवन गरिरहेको छु’, उनले भनिन् ।
अन्तरवार्तामा उनले ‘आफ्नै रिसले’ महरामाथि आरोप लगाएको स्विकार गरेकी छन्।
सोमबार पीडित भनिएकी ति महिलाले रक्सीले मातेर आइतबार राति आफ्नो कोठामा आएका महराले आफूमाथि जवर्जस्ती करणी गरेको बताएको भिडियो अन्तर्वार्ता ‘हाम्रा कुरा’ ले सार्वजनिक गरेको थियो ।
यौन दुराचारको आरोप लागेपछि महराले सभामुख पदबाट राजीनामा दिएका छन् । मंगलबार उनले उपसभामुख डा. शिवमाया तुम्बाहाम्फेलाई सम्बोधन गरी ‘छानबिन नसकिँदासम्म का लागि’ राजीनामा दिएको उल्लेख गरेका छन् ।
यता, महरालाई पक्राउ गरेर अनुसन्धान गर्न माग गर्दै राजधानीमा मंगलबार दिउँसो काठमाडौंमा प्रदर्शन भएको छ । प्रदर्शनमा संलग्नहरुले ‘नो मिन्स नो..’, ‘बलात्कार आरोपको सत्यतथ्य छानबिन गर..’ ‘बलात्कार आरोपीलाई हिरासतमा लेउ’ लेखिएका पम्पप्लेट समातेर विरोध गरेका थिए । राजनीतिज्ञ, विद्यार्थी, अधिकारकर्मी लगायत प्रदर्शनमा सहभागी रहेको थिए ।
