काठमाडौं । सभामुख कृष्णबहादुर महरामाथि संसद सचिवालयकी एक महिला कर्मचारीमाथि यौन दुराचार गरेको आरोप लागेको छ । रोल्पा स्थायी घर भएकी ति महिलाले आइतबार राति महरा काठमाडौंको तीनकुनेस्थित उनको डेरामा आएर जवर्जस्ती करणी गरेको आरोप लगाएकी हुन् ।
मदिराले मातेर कुटपिट गरी आफूलाई सभामुखले जर्बजस्ती गरेको उनको आरोप छ। महराको पिटाइबाट शरीरमा निलडाम लागेको र शरीरसमेत सुन्निएको उनले उल्लेख गरेकी छिन्।
सो आरोपबारे सभामुख महराले भने ति महिलाले कर्मचारी समायोजनमा राजधानी बाहिर जानुपरेको रिस आफूमाथि पोखेको दाबी गरेका छन्। केही समयअघि सामान्य प्रशासन मन्त्रालयले कर्मचारीको समायोजन गरेको थियो। त्यसमा ती महिला काठमाडौं बाहिर परेको महराको दाबी छ ।
सभामुख महराले ती महिलालाई आफूले २०४७ सालदेखि नै चिनेको र आफूले नै हुर्काइ, पढाइ गरेको बताए । महरा पहिले रोल्पामा शिक्षक थिए ।महरा र ती महिलाका श्रीमान् साथी हुन् । श्रीमानको मित्र भएका कारण महरा महिलाको डेरामा आउने–जाने गरिरहन्थे । त्यही क्रममा आइतबार साँझ दुर्व्यवहारको शिकार भएको उनको दाबी छ ।
महिलाले सभामुख पहिल्यैदेखि आफ्नो डेरामा आउजाउ गर्ने गरेका र आफूले ‘सर’ भनेर सम्मान गर्ने गरेको बताउँछिन् । तर, आइतबार राति श्रीमान् नभएको समयमा जवर्जस्ती आफू सुत्ने कोठामा प्रवेश गरेका महराले मदिराको नशामा आफूमाथि कुटपिट गर्दै जवर्जस्ती करणी गरेको बताइन्।
घटनापछि महिलाले प्रहरीलाई खबर गरेकी थिइन्। त्यसपछि महरा कोठाबाट बाहिरिएका थिए। महानगरीय प्रहरी वृत्त नयाँ वानेश्वरबाट केही समयपछि कोठामा पुगेको प्रहरी टोलीले त्यहाँको फोटो र भिडियो खिचेको थियो।तर, यस सम्बन्धमा प्रहरीले कुनै प्रतिक्रिया दिएको छैन । प्रहरीले त्यस्तो घटनाको जाहेरी नपरेको बताएको छ ।
सभामुख राज्यको सम्मानित पद हो। राज्यको बरियताक्रममा यो पद राष्ट्रपति, उपराष्ट्रपति, प्रधानमन्त्री, प्रधान न्यायाधीशपछि पाँचौं नम्बरमा छ।
