काठमाडौँ । आगामी मङ्गलबारदेखि एक हप्ता लामो वर्षा हुन सक्ने मौसम पूर्वानुमान व्यक्त गर्दै मौसमविद्ले अहिल्यै ध्यान स्याहार्दा विचार गर्न सुझाव दिएका छन् ।
मौसमविद् डा. विनोद पोखरेलका अनुसार अर्को सातादेखि नेपालका धेरै क्षेत्रमा वर्षा हुने सङ्केत देखिएको हो ।
बङ्गालको खाडीमा विकसित न्यूनचापीय प्रणालीको प्रभावले वर्षा हुने सम्भावना देखिएको उनले बताए ।
डा. पोखरेलले भने– ‘विभिन्न मौसम पूर्वानुमान मोडेलले आगामी मङ्गलबारदेखि करिब एक साताभन्दा लामो समयसम्म वर्षा हुन सक्नेछ ।
चारोटा मौसम पूर्वानुमान मोडेलको औसत पूर्वानुमान चित्र फेसबुकमा सार्वजनिक गर्दै उनले केही स्थानमा भारी वर्षासमेत हुन सक्ने सङ्केत देखिएको बताए ।
उनका अनुसार विभिन्न मोडेलले वर्षाको स्थान र मात्राबारे फरकफरक अनुमान गरेका छन् । त्यसैले अहिले नै कुन ठाउँमा कति वर्षा हुन्छ भन्ने यकिन गर्न कठिन छ । आगामी दिनमा मौसम पूर्वानुमानमा परिवर्तन आउन सक्ने भएकाले पछिल्ला अपडेटलाई ध्यान दिनुपर्ने उनले बताए ।
वर्षाको सम्भावनालाई ध्यानमा राख्दै उनले धान काट्ने तयारीमा रहेका किसानलाई मौसमको पूर्वानुमान हेरेर योजना बनाउन सुझाव दिएका छन् ।
अर्को साताको मङ्गलबारदेखि धान काट्ने योजना बनाएका किसानले सम्भव भए त्यसअघि नै धान काटेर सुरक्षित रूपमा भित्राउन वा वर्षा रोकिएपछि मात्र काट्ने गरी तयारी गर्नुपर्ने उनको भनाइ छ ।
केही स्थानमा असिनासहित वर्षा हुन सक्ने सम्भावना पनि देखिएकाले किसानले थप सतर्कता अपनाउनुपर्ने मौसमविदको भनाइ छ ।
यसैगरी, हिमाली क्षेत्रमा मौसम प्रतिकूल हुँदा जोखिम बढ्न सक्ने भएकाले यात्रा तथा पदयात्रामा निस्कनेलाई विशेष सावधानी अपनाउन आग्रह गरिएको छ । यात्रा वा ट्रेकिङको तयारीमा रहेकाले नियमित मौसम पूर्वानुमान र आधिकारिक सूचनाका आधारमा आफ्नो योजना बनाउन सुझाव दिइएको छ ।
