भरतपुर । चितवन राष्ट्रिय निकुञ्जले चाडपर्व लक्षित गर्दै सुरक्षा रणनीति तयार गरेको छ । रणनीतिअनुसार निकुञ्ज प्रशासन र निकुञ्ज सुरक्षार्थ खटिएको नेपाली सेना गरी एक हजार दुई सय बढी जनशक्ति परिचालन गरिनेछ ।
निकुञ्जका सूचना अधिकारी अविनास थापामगरका अनुसार चाडपर्वमा अपरिचित व्यक्तिको चहलपहल बढी हुने हुँदा चोरीसिकारी हुन सक्ने भएकाले सुरक्षा रणनीतिका साथ उच्च सतर्कता अपनाइएको हो ।
उनले भने– ‘अहिले संवेदनशील क्षेत्रमा ३५ स्पाई क्यामेरा जडान गरेर सुरक्षा दिइएको छ ।’ चोरीसिकारीका हिसाबले जोखिम रहेका क्षेत्रमा स्पाई क्यामेरासहित क्याम्पिङ एन्ड एम्बुसिङलगायतका काम गरिने उनले जानकारी दिए ।
सूचना अधिकारी मगरका अनुसार विगतमा हुने गरेका नियमित गस्तीसहित स्विपिङ, पेट्रोलिङ, साइकलगस्ती, मोटरसाइकल गस्ती, बोट, गाडी र हात्तीबाट गस्ती गरिनेछ । चार्डपर्वको समयमा निकुञ्ज आसपासमा बसोबास गर्ने स्थानीय पर्व मनाउन लाग्ने भएकाले चोरीसिकारीका बढी संवेदनशील मानिने गरिन्छ । संवेदनशील क्षेत्रमा लिङ्क पेट्रोलिङलगायतका काम भइरहेको छ । चुरे क्षेत्रमा समेत चोरीसिकारी हुन सक्ने भएकाले सो क्षेत्रलाई समेत मध्यनजर गर्दै सुरक्षा व्यवस्था मिलाइएको छ ।
निकुञ्ज क्षेत्रभित्र ५७ स्थायी पोस्ट र ३ अस्थायी पोस्टबाट सुरक्षा दिने काम भइरहेको छ । यसलाई अझै चुस्त बनाउँदै स्थानीयसँगको साझेदारीमा निकुञ्ज सुरक्षा गरिनेछ । शङ्कास्पद स्थानमा तालिमप्राप्त कुकुर (स्निफर डग) मार्फत निगरानी गरिने छ । आवश्यकताअनुसार अन्य सुरक्षा निकायसँग समेत समन्वय गरेर निकुञ्ज क्षेत्रमा रहेका बस्तीमा तदारुकता बढाइएको उनले जानकारी दिए ।
