काठमाडौं । कोरोना संक्रमण पुष्टि भएका तीन र उस्तै लक्षण देखिएका एक जना गरी चार जनाको विभिन्न अस्पतालमा उपचारका क्रममा ज्यान गएको छ ।

ललितपुरको पाटन अस्पतालमा कोरोना संक्रमित ३८ वर्षीया एक महिलाको मृत्यु भएको छ। अस्पतालका अनुसार ३८ वर्षीय महिलाको मंगलबार राति उपचारका क्रममा मृत्यु भएको हो । उनी जनकपुरकी हुन्।

साउन १८ गते अस्पताल भर्ना गरिएकी उनलाई मेनिन्जाइटिसको समस्या पनि देखिएको चिकित्सकहरुले बताएका छन्।

यता, कोरोना संक्रमणबाट मेडिसिटी अस्पतालमा जनकपुरका पूर्वमेयरको निधन भएको छ । पूर्वमेयर कृष्ण गिरीको काठमाडौंस्थित मेडिसिटी अस्पतालमा उपचारको क्रममा मंगलबार राति मृत्यु भएको परिवारिक स्रोतले जनाएको छ ।

जनकपुरको मिल्स एरियामा रामा होटेल सञ्चालन गर्दै आएका गिरीलाई १५ दिनअघि कोरोना संक्रमण पुष्टि भएको थियो। उनको अवस्था बिग्रिदै गएपछि केहि दिन अघि श्री एयरलायन्सको विमान चार्टर गरी थप उपचारको लागि काठमाडौंको मेडिसिटी हस्पिटलमा भर्ना गरिएको थियो ।

यसैगरी, बुटवलस्थित धागो कारखानामा रहेको कोरोना विशेष अस्पतालमा दुई जनाको मृत्यु भएको छ । दुई मध्ये एक जनामा कोरोना पुष्टि भएको छ भने एक जनाको रिपोर्ट आउन बाँकी छ । मृत्यु भएका दुवै जनामा निमोनिया र किड्नीको समस्या रहेको अस्पतालले जनाएको छ।

उपचारका क्रममा मुत्यु भएका कपिलवस्तु कृष्णनगरका ४२ वर्षीय कोरोना संक्रमित पुरुषमा निमोनिया, दायाँ फोक्सो र पिसाबमा समेत खराबी देखिएको लुम्बिनी प्रादेशिक अस्पतालका प्रवक्ता डा. विष्णु गौतमले जानकारी दिनुभयो ।

२५ गते अस्पताल भर्ना भएका उनको पीसीआर जाँच गर्दा कोरोना पुष्टि भएपछि सोही दिन कोरोना विशेष अस्पतालको भेन्टिलेटरमा राखेर उपचार भइरहेको थियो । उपचारकै क्रममा उनको बुधबार बिहान साढे चार बजे मृत्यु भएको हो ।

यस्तै, अर्का मृतक कोरोना भाइरसको लक्षण देखिएका तौलिहवाका २५ वर्षीय पुरुषमा किड्नी र उच्च रक्तचापको समस्या देखिएको अस्पतालले जनाएको छ । यी पुरुषको गएराति साढे २ बजे मुत्यु भएको हो उनको हिजोमात्रै पीसीआर जाँचका लागि स्वाब लिइएको थियो। रिपोर्ट अझै आएको छैन ।