चौतारा । चीनतर्फको न्यालमस्थित झिम्मु पोस्टनजिकै पहिरो खस्दा भोटेकोशी नदीको बहाव प्रभावित भएसँगै नेपालतर्फ चिन्ता बढेको छ ।

भोटेकोसी गाउँपालिकाका अध्यक्ष पासाङ नोर्बु शेर्पाका अनुसार बिहीबार बिहान भोटेकोशी गाउँपालिका–२ लिपिङको पारिपट्टि चीनतर्फको क्षेत्रमा पहिरो खसेको हो ।

पहिरोका कारण चीनबाट नेपालतर्फ बग्ने भोटेकोशी नदीको बहाव करिब आधाजति थुनिएको बताइएको छ । सो कारणले जुनसुकै बेला पनि बिपद्जन्य घटना निम्तिन सक्ने सम्भावना रहेको भन्दै तल्लोतटीय क्षेत्रमा उच्च सतर्कता अपनाउन अध्यक्ष शेर्पाले आग्रह गरे ।

विशेषगरी भोटेकोशी, बाह्रबिसे, बलेफी पालिकाअन्तर्गतका नदीतटीय बासिन्दालाई सतर्क रहन तथा नदीकिनार र जोखिमयुक्त क्षेत्रमा नजान सशस्त्र प्रहरी बल लामोसाँघुले अनुरोध गरिएको छ ।