काठमाडौँ । न्यूनतम पारिश्रमिक, श्रम शोषणको अन्त्य तथा नर्सिङ पेशासँग सम्बन्धित १५ बुँदे माग पूरा गर्नुपर्ने मागसहित आमरण अनशनमा रहेकी नर्स ज्योति रानाभाटको समर्थनमा काठमाडौं उपत्यकाका स्वास्थ्यकर्मी तथा नर्सहरूले वीर अस्पतालमा प्रदर्शन गरेका छन्।
अनशनको छैटौं दिन मंगलबार वीर अस्पताल परिसरमा आयोजित प्रदर्शनमा सहभागी स्वास्थ्यकर्मीहरूले रानाभाटले उठाएका मागहरू न्यायोचित रहेको भन्दै सरकारले तत्काल सम्बोधन गर्नुपर्ने बताएका छन्।
प्रदर्शनकारीहरूले ‘नर्स बचाऔँ, स्वास्थ्य बचाऔँ’, ‘सम्मानजनक सेवा–सुविधाको सुनिश्चितता गर’, ‘नर्सिङ ऐन कार्यान्वयन गर’, ‘गुणस्तरीय नर्सिङ शिक्षा कायम गर’ तथा ‘बिरामी सुरक्षाको प्रत्याभूति गर’ लगायतका सन्देश लेखिएका प्लेकार्ड बोकेर सरकारको ध्यानाकर्षण गराएका थिए।
नर्स रानाभाट साउन १४ गतेदेखि न्यूनतम पारिश्रमिकको सुनिश्चितता, श्रम शोषणको अन्त्य, सेवा–सुविधामा सुधारलगायतका माग राख्दै आमरण अनशनमा बसेकी हुन्। अनशनका क्रममा स्वास्थ्य अवस्था जटिल बन्दै गएपछि उनलाई वीर अस्पतालको सघन उपचार कक्ष (आईसीयू) मा भर्ना गरिएको छ।
प्रदर्शनमा सहभागी नर्स तथा स्वास्थ्यकर्मीहरूले विगतमा नर्सहरूको तलब–भत्ता, सेवा–सुविधा, वृत्ति विकासलगायतका विषयमा सरकारसँग विभिन्न सहमति भए पनि ती कार्यान्वयन हुन नसकेको गुनासो गरेका छन्। उनीहरूले यसपटक पनि माग बेवास्ता गरिए स्वास्थ्य क्षेत्र अझ प्रभावित हुने चेतावनी दिएका छन्।
रानाभाटको आन्दोलनप्रति डेन्टल साइन्स हाइजेनिष्ट एसोसिएसन अफ नेपाल, नेपाल पब्लिक हेल्थ एसोसिएसन, हेल्थ असिस्टेन्ट एसोसिएसन अफ नेपाल र नेपाल सीएमए संघ लगायतका स्वास्थ्यसम्बद्ध संस्थाहरूले पनि ऐक्यबद्धता जनाएका छन्। ती संस्थाहरूले सरकारलाई रानाभाटको जीवन रक्षालाई प्राथमिकतामा राख्दै तत्काल सार्थक वार्ता गरी सहमतिमा पुग्न आग्रह गरेका छन्।
