धनगढी । बिहीबारदेखि अनशन थालेका डा. गोविन्द केसीलाई धनगढीस्थित कृष्णमन्दिर धर्मशाला खाली गर्न पत्र पठाइएको छ ।
कृष्णमन्दिर धर्मशाला व्यवस्थापन समितिले २०८३ साउन ८ गते शुक्रबार डा. केसीलाई धर्मशाला छाड्न आग्रह गर्दै पत्र दिइएको हो ।
डा. केसी पाँच बुँदे माग राख्दै बिहीबारदेखि धर्मशालामा बसेर अनिश्चितकालीन अनशनमा छन् ।
व्यवस्थापन समितिका अध्यक्ष मुक्तिनाथ पन्तका अनुसार धार्मिक संस्थामा अनशन बस्न किन अनुमति दिइयो भन्ने विषयमा बाहिरबाट दबाब आउन थालेपछि धर्मशाला खाली गर्न अनुरोध गरिएको बताइएको छ ।
डा. केसी बस्नका लागि धर्मशालामा आएको जानकारी गराइए पनि पूर्वसूचना नदिई त्यहीँबाट अनिश्चितकालीन अनशन सुरु गरिएको उनले बताए ।
अध्यक्ष पन्तले धर्मशाला खाली गर्न पठाइएको पत्रको बोधार्थ जिल्ला प्रशासन कार्यालय र जिल्ला प्रहरी कार्यालय कैलालीलाई समेत दिइएको जानकारी दिए ।
यतिखेर डा. केसीको अनशनको सुदूरपश्चिमबाट विरोध भइरहेको छ ।
बिहीबार अनेरास्ववियु कैलालीका अध्यक्ष कुवेर खड्काले र शुक्रबार सहिद दशरथ चन्द स्वास्थ्य विज्ञान विश्वविद्यालय सङ्घर्ष समितिका संयोजक लोकराज पाण्डेले अनशन नबस्न सार्वजनिक आग्रह गरेका थिए ।
