ललितपुर। पाटन कलेज फर प्रोफेसनल स्टडिज (पीसीपीएस) ले स्टार्टअप गर्न चाहने आफ्ना विद्यार्थीलाई उत्कृष्ट व्यावसायिक परियोजनाका आधारमा बीउ पुँजी उपलब्ध गराउने भएको छ।
कलेजको दीक्षान्त समारोहमा एलबीईएफ ग्रुपका अध्यक्ष पंकज कुमार जालानले युवा उद्यमशीलता प्रवर्द्धनका लागि ‘युवा उद्यमशीलता विकास कार्यक्रम’ अन्तर्गत उत्कृष्ट परियोजनालाई बीउ पुँजीसँगै आवश्यक प्राविधिक सहयोग पनि प्रदान गरिने जानकारी दिनुभयो।
उहाँले नेपाली विद्यार्थीले प्रमाणपत्र प्राप्त गरेपछि विदेशिनुपर्ने सोच परिवर्तन गर्दै स्वदेशमै रोजगारी र उद्यम सिर्जना गर्ने उद्देश्यले यो अवधारणा अघि सारिएको बताउनुभयो।
बेलायतको बेडफर्डशायर विश्वविद्यालयसँग आबद्ध पीसीपीएस कलेजमा आयोजित समारोहमा कम्प्युटर साइन्स एन्ड सफ्टवेयर इन्जिनियरिङ (बीएस्सी) २०२५ का ३२ जना र सफ्टवेयर इन्जिनियरिङ (बीएस्सी) २०२६ का २५ जना गरी ५७ जना विद्यार्थी दीक्षित भएका थिए।
कार्यक्रममा एलबीईएफ ग्रुपका कार्यकारी निर्देशक प्रकाश कजेरीवालले स्वदेशमै अन्तर्राष्ट्रियस्तरको शिक्षा प्रदान गर्ने प्रतिबद्धता दोहोर्याउनुभयो भने बेडफर्डशायर विश्वविद्यालयका प्राध्यापक एन्ड्रयु चर्चले पीसीपीएससँगको सहकार्यलाई आगामी दिनमा पनि निरन्तरता दिने विश्वास व्यक्त गर्नुभयो।
