काठमाडौं । आफूलाई चिकित्सकका रूपमा प्रस्तुत गर्दै बिरामीलाई उपचार तथा औषधि सिफारिस गरेको आरोपमा पक्राउ परेकी डा. चेतना पौडेलको विषयमा योग तथा प्राकृतिक चिकित्सक संघ, नेपालले आपत्ति जनाएको छ। संघले पौडेललाई ‘नक्कली चिकित्सक’ भनेर चित्रण गरिएकोप्रति असहमति व्यक्त गरेको हो।
नेपाल प्रहरीको केन्द्रीय अनुसन्धान ब्युरो (सीआईबी) ले पौडेललाई काठमाडौंको चन्द्रागिरि–८ स्थित स्पार्क इन्टरनेसनल हेल्थ रिसोर्टबाट पक्राउ गरेको थियो। उनीमाथि आफूलाई चिकित्सकका रूपमा प्रस्तुत गर्दै एलोपेथिक परीक्षण तथा औषधि ‘प्रेस्क्रिप्सन’ गरेको आरोपमा अनुसन्धान भइरहेको छ।
योग तथा प्राकृतिक चिकित्सक संघका अनुसार पौडेलले भारतको राजीव गान्धी स्वास्थ्य विज्ञान विश्वविद्यालयबाट बीएनवाईएस (बैचलर अफ नेचुरोप्याथी एन्ड योगिक साइन्सेज) उपाधि हासिल गरेकी हुन्। उक्त योग्यता त्रिभुवन विश्वविद्यालयबाट समकक्षता प्राप्त रहेको तथा उनी नेपाल स्वास्थ्य व्यवसायी परिषद्मा विधिवत् दर्ता रहेको संघको दाबी छ।
यद्यपि नेपाल मेडिकल काउन्सिल ऐनअनुसार ‘चिकित्सक’ भन्नाले मेडिकल काउन्सिलमा दर्ता भई आधुनिक चिकित्सा प्रणालीअन्तर्गत अभ्यास गर्ने व्यक्तिलाई बुझिने व्यवस्था छ। स्वास्थ्य व्यवसायी परिषद्का अनुसार पौडेलले ‘डा.’ उपाधि प्रयोग गर्दै बिरामीलाई रगत परीक्षण र एलोपेथिक औषधि सिफारिस गरेको आरोप लागेको छ।
यस घटनाले बीएनवाईएस चिकित्सकहरूको कानुनी हैसियत, कार्यक्षेत्र तथा ‘डा.’ उपाधि प्रयोगसम्बन्धी विषयमा नयाँ बहस सिर्जना गरेको छ। हाल पौडेलविरुद्ध अदालतबाट म्याद थप गरी अनुसन्धान जारी रहेको प्रहरीले जनाएको छ।
