काठमाडौं । काठमाडौं उपत्यका लगायत देशका विभिन्न ठाउँमा कोरोना संक्रमण बढेपछि आजदेखि सार्वजनिक तथा निजी सवारी साधनमा जोर विजोर प्रणाली लागू गरिएको छ । १४ वटा जिल्लाका कतिपय क्षेत्रमा निषेधाज्ञा जारी गरिएको छ ।
काठमाडौं उपत्यकामै कोरोना संक्रमण दैनिक बढिरहेका छन् । विज्ञहरुले भिढभाडमा नजान र सामाजिक दूरी कायम गर्न बारम्बार सचेत गराएका छन् ।
सरकारको केन्द्रीय संयन्त्र रहेको सिंहदरबार क्षेत्रमा सम्बन्धित व्यक्ति बाहेकलाई प्रवेश निषेध गरिएको छ । तर, सरकारकै एउटा कार्यालय ‘सूचना तथा प्रशारण विभाग’ मा भने दैनिक सयौं पत्रकारहरुको भीड लाग्ने गरेको छ ।
बुधबार सूचना विभागमा हामी पुग्दा कार्यालय परिसरमा सयौं जना जम्मा भएका थिए । खासगरी पत्रकार परिचय पत्र लिन, नविकरण गर्न तथा अनलाइन दर्ताका लागि पत्रकारहरुको भीड देखिन्थ्यो ।
कार्यालय भित्र प्रवेश निषेध गरिएको छ । बाहिरै झ्यालबाट उनीहरुले आफ्ना कागजपत्र बुझाइरहेका देखिन्छन् । तर, त्यसो गर्दा कुनै सामाजिक दूरी कायम गरिएको देखिँदैन ।
कर्मचारीहरुले बेला मौकामा माइकबाट ‘कोभिड–१९’ को संक्रमण बढेको स्मरण गराउँदै पत्रकारहरुलाई सामाजिक दुरी कायम गर्न सम्झाइरहेको सुनिन्थ्यो । तर, साघुँरो ठाउँमा धेरै जना जम्मा हुँदा र आफ्नो काम छिटो होस् भन्ने सोचाइका कारण दुरी कायम गरेको पाइएन।
सरकारले प्रेस पास विना सिंहदरबार प्रवेश गर्न नदिने कारणले गर्दा कैयौं व्यक्तिहरुले दुःख पाएका छन् । अहिलेको जटिल अवस्थामा प्रेस पास नविकरण नभएपनि सिंहदरबार प्रवेश गर्न दिन नेपाल पत्रकार महासंघले गरेको आग्रह सरकारले वास्ता गरेको छैन ।
यसले गर्दा सूचना विभागमा दैनिक भीड लागिरहेको छ । यदी त्यहाँबाट संक्रमण फैलियो भने त्यसले थप भयावह बनाउने निश्चित छ ।
